ЦIуне кибго камиллъи

Хвел нахъе чIвалеб дару батичIо,
Ахираталъул рокъоре къачIади гуреб.
Дунялалда рукIаго тIагIат гьабизе,
РакI тIамизабеги щивав чиясул.
Дунялалъул рокъоб икъбал кьунщинас,
Алжан щвайин гьардей битIараб жойищ?
ТIад лъурал хIукъукъал тIурачIев инсан,
Аллагьасда цеве вахъун кин чIелев?
Бечелъи кьогеги инсан кIочараб,
Гьеб цIадахъ босарав чиги рагIичIин.
Къоги бачIунгеги Аллагь кIочараб,
Къосиналда гьелъул хIинкъи букIунин.
Аллагьасда цере рацIцIад рукIине
МацIалъ гурищ нилъей квалквал гьабулеб.
Халваталдаги чIун гьабеха тIагIат,
ТIеренлъулин нилъер рицатал ракIал.
Аллагьас рижарал Адамил лъимал,
Щай нилъ къацандулел боцIи сабаблъун.
Къадар ккараб къоялъ тIаса лъугьине
Щай гIадамал толел чIаго рукIаго.
Бокьуге дуниял, кIочонге Аллагь,
КIвараб тIагIат гьабе чIаго рукIаго,
ХIакълъун лъалеб буго хвезе ругеблъи,
Хвалде щукру гьаби - тIадаб щивасда.
Аллагьасда гурев инсан лъаларо,
Амма рокьукъав чи лъидаго лъала.
Нахъасан гаргалев, бугьтанал лъолев,
Халикъасда аскIов какарав вуго. 
Аллагьас даран хIалал гьабуна,
ХIарамаб жо гьоркьоб хъвазе течIони.
ТIаде щвараб ризкъи хIарам гьабуна,
ХIарамабги гьабун босун батани.
Аллагьасде божун гIумру тIамурав
ВитIун ккарав чилъун кивго рикIкIуна.
Чорхол напсги квегъун хьвадарав инсан,
КIодолъун вукIуна халкъалда гьоркьов.
Аллагьасе гIоло ралел каказулъ
ЦIунизе ккеларищ кибго камиллъи?
Рихьдае гьабулеб тIагIат бугони
ТIадегIанас къимат лъикIаб кьеладай?
Гьабе Аллагьасе кIвараб гIибадат,
ГIадада риччаге гIумрудул къоял.
Хабалъ вукъун хадуб кIал гьикъиялъе,
ХIарамаб магIишат данде гьабуге.

Низамудин Гъазиев, ЦIолода росу, ГIахьвахъ район,