Дир бечелъи
Дир кIудияб бечелъи,
Сахал дир гьудулзаби.
Гьелгун араб гIумруги,
ГIаданлъиялъул нухги.
Гьабун тараб лъикIлъиги,
Гьелъул ккараб хIасилги.
Вацал-яцалгун цадахъ,
Щвараб дие рохелги.
Щибго нечезе ккечIеб,
ГIумру гIуцIизе кIвейги.
ГIадамазда гьоркьовги,
Адабалда хьвадиги.
ГIел бащадалгун цадахъ,
ГIаданлъи, яхI цIуниги.
ЦIакъав чилъун вихьизе,
Ххвелал гьаричIолъиги.
Бергьаразда гьоркьовги,
БацI гIадин вахъун чIейги.
Ккаралъуб зарги борхун,
ЗагIипасул рахъ кквейги.
Инсанасул нафс какун,
РагIи абизе ккечIо.
РитIухълъи ккун хьвадизе,
Аллагьас квер бакъана.
