Питна бессараб заман
Питна бессараб заман
Ургъелал гIемераб, питна бессараб,
ЗахIмалъабаз цIураб ахирзамана.
Унгоги тIаде щун бихьулеб буго,
ГIакълу хIалтIизаби тIалъулеб буго.
ТIуртIудилаго гьаб дуниялги ккун,
«Дир буго», - ян абун нилъ рорчIиларо.
Нафсгун гьаваялда чангиталги ран,
Диналъул лъаралъе лъугьине ккела.
Алжаналъул рохел жидеда бицарал,
АсхIабзабазулцин хIинкъи букIана.
Нилъее хвасарлъи щунгойищ бугеб,
ГьадигIан гъапулго гIумру щущазе?
ГIалимзаби какун, муфтиясде бан,
Къиямасеб къоялъ хвасарлъиларо.
Рокьулел лагъзазе зарал гьабурал
Рагъ Жинца лъазабун, хIакъир гьарула.
Тавбуялде рачIа, кватIун ккелалде.
Аллагьасул рахIмат гIаммабин бугеб.
ГIибадат гьабизе гIедегIел гьабе,
Хоб гвангъулеб гIамал цебе ккезабе.
Рагье нужер ракIал, жанире ракке,
Щиб гьениб кIвар кьолеб, хирияб бугеб?
БетIергьанищ вугев, дунялищ бугеб,
Иманищ, щайтIанищ бергьунеб бугеб?
Дир диналъул вацал, хириял яцал,
КантIиялъул бакъ щун, гвангъун рачIаги.
Аллагь вокьиялъул чIор ракIалда къан,
Гьесукьа хIинкъиялъ жаниса цIеги!
