Баркула рабигIул аввал
Аварагасул моцI, рабигIул аввал,
Исанаги буго бачIун тIаде щун.
БачIараб батаги баркат-рахIматгун,
РахIманасул цIобал ракьалде рещтIун.
Расул жанив гьавун хира гьабураб,
Гьабизин нилъеца моцIалъул адаб.
МухIаммад авараг кIодоги гьавун,
Гьесул гIумруялъул хIакъикъат бицун.
Берцинал мажлисал, руссенал гIуцIун,
ГIадамал данделъун, мавлидал ахIун.
ХIабиб дунялалде вачIиналдалъун,
Лъугьарал хIикматал рехсеялдалъун.
Халикъас нилъее рахIматлъун кьурав,
РахIманасе бищун вокьулев Расул.
Гьесул умматалъул нилъго ратиялъ,
Рецц БетIергьанасе гьабе кидаго.
Пикру гьабе гьанже, диналъул агьлу,
Аллагьас гьединан кIодо гьавурав,
Халкъалъе рахIматлъун витIарав Расул,
Вохизе гьавулев вугищ нилъеца?
Гьев хирияв Расул, нилъер авараг,
Разияб гIамалгун гIумру гьабулищ?
Гьесул хIадисазда рекъон хьвадизе,
ХIаракат бахъулеб бугищ нилъеца?
ХIабиб умматалъул ургъалилъ вуго,
Умматин абуни - боцIул ургъалилъ.
Бичасда шапагIат гьарулев Расул,
Рокъобе магIишат бакIарулел нилъ.
ЛъугIел жиндий гьечIеб боцIуде руссун,
Биччаге гIадада баракатаб моцI.
БачIарабго гIадин тIасаги уна,
Ун хадуса нилъер ракIги бухIила.
Дунялалъул боцIи гIуцIулел рукIун,
РекIекълъила вацал, диналъул яцал,
Цоги хирияб моцI нилъее щвараб,
Щибго кIвар кьечIого борчIизе тани.
Бичас рахIматлъун нилъее кьурав,
Расуласул рехсей гIемераб гьабе.
Гьесде свалат битIе, суннатал тIурай,
ТIагьаясул баркат-шапагIат щвезе.
Щивас яхIги бахъе, бачIараб моцIалъ,
Аллагь разилъизе, Расул вохизе.
Нилъер чорхолъ ругел квешал гIамалал,
ГIодоре рехизе, ритIун хьвадизе.
