Алжаналде нух
Дунялалъул кинабго иш сабабазда базабун бугебго гIадин, инсан дунялалде вачIинги эбел-инсудалъун буго. Лъиего балъгояб жо гуро лъимаде эбел-инсул букIунеб гурхIелги, кIудияб тIалаб-агъазги. Гьединлъидал нилъеда исламалъ тIад гьабула эбел-инсул камилаб адаб гьабизе. Къуръаналъулги ахIи буго эбел-эмен кIодо гьарейин абураб.
ТIадегIанав Аллагьас ﷻ абулеб буго (магIна): «Дур БетIергьанас амру гьабуна нужеца Гьесие гурони цогидазе гIибадат гьабугейин, эбел-инсуе лъикIлъи гьабейинги…», – ян. Аллагь цо гьавиялда хадуб рехсеялъ магIна кьола гьелъул кIудияб амру букIин. Гьаб ахирзаманалда гIемер кколел руго лъимал жидерго умумузде данде рахъарал хIужаби. Лъидаха лъалареб кигIанаб захIматги бихьун гьел гIезарулелали, гьелъул гIемерисеб захIмалъи эбелалда букIунеблъи.
Хирияб хIадисалда буго: «Ибну МасгIудица абуна: «Дица гьикъана аварагасда, Аллагьасе бищун бокьулеб гIамал щибин абун. ГIужда как бай бугин абуна гьес. Дица абуна цинги щибин. Цинги гьес абуна, эбел-инсуе лъикIлъи гьаби бугоян. Дица абуна цинги щибин. Аллагьасул ﷻ нухда гъазават гьаби буго», - ян абуна. ХIатта капурал ругониги эбел-инсул адаб рехизе бегьуларо.
Цогидаб хIадисалда буго: «Асмаица бицун буго, къурайшиязулгун кьалда рукIаго жеги бусурбанлъичIей эбел ячIанин нижехъе. Дица Аварагасда ﷺ гьикъанин гьелъулгун гьуинлъи гьабун, гьей къабул гьайилищ абун. Къабул гьаейин жаваб кьунила гьес».
Тирмизияс бицараб хIадисалда буго: «Аллагь ﷻ разилъи эмен разилъиялъулъ буго, Гьесул ццим бахъин умумузул ццим бахъиналъулъ буго», – ян. Цо къоялъ пуланав чи вачIана Аварагасухъе ﷺ жиндие бокьун бугин гъазаваталде ине, гьелъул хIакъалъулъ мушавара гьабизе вилъун вугинги абун. Цинги Аварагас ﷺ гьесда абуна: «Дур эбел йигищ?» - илан. «Йиго», - ян абуна гьес. «Гьедин батани мун гьелда аскIов чIа, хIакълъунго, Алжан гьелъул кIиябго хIатIикь буго», - ян.
Абу Гьурайратица, эбелалъул рокъоса къватIиве вахъунеб мехалъ, нуцIикIалтIаги чIун, гьелда абулаан: «Ассаламу гIалайка я умматагь! Ва рахIматуллагьи ва баракатугьу (Аллагьасул ﷻ саламги баракатги лъеги дуда, дир эбел)». Цинги гьелъги абулаан: «Ва гIалайка я бунайя, ва рахIматуллагьи ва баракатугьу (Дудаги лъеги Аллагьасул ﷻ саламги баракатги)». Нахъеги гьес абулаан: «РахIимакиллагьу кама раббайтани сагъиран (Аллагь ﷻ гурхIаги дуда дун гьитIинго вукIаго хьихьаралъухъ)». Ахиралдаги гьелъ абулаан: «РахIимакаллагьу, кама саррартани кабиран (дудаги Аллагь ﷻ гурхIаги, гьадин дун йохизаюрав)». Жаниве лъугьунелъулги гьебго абулаан гьес.
