Я, Аллагьасул Сайид
Я, Аллагьасул Расул,
Салам лъеяв МухIаммад,
Умматалъе хирияв
Халикъасул амбияъ.
Дур умматлъун ратиги
ТалихI бугин нижее,
Тавпикъ кьун, рохизаре,
Хиралъун ислам гьабун.
Я, Аллагьасул Расул,
Салам лъеяв мун - ХIабиб,
Сабаблъун нижей кьурав,
РацIцIалъи тIокIав тIалиб,
ТIолго рецц дуй, БетIергьан,
«БахIрул нубават» кьурав,
Жагьилал рукIаниги,
РакIал нижер рохизе.
Я, Аллагьасул Сайид,
«СахIихIав» нижер Наби,
Ният бацIцIад гьабизе
Гьабе кумек нижее.
Какгин кIал гьуин гьабун,
Гъафлаталде риччаге,
Гъаримал муъминзаби
Мунагьалдаса гьукъе.
Я, Аллагьасул Сайид,
Ссунареб динул чирахъ,
ТIарикъаталъул нухда –
Нуха регIе дуца ниж.
РахIимакаллагь Расул,
Руссун ругин ниж дуде,
Дуца квербакъиялде
Кидаго божи бугел.
Я, Аллагьасул Илчи,
Умматалъул «МархIаба»,
МахIрум гьарун тоге ниж
Бичасул цIобалдаса.
ЦIар берцинав МухIаммад,
ХIакъав Бичасул Расул,
Раче дуца рагIдукье
ГIарас-майданалда ниж.
Я, Аллагьасул Расул,
Расулазул кIудияв,
РабигIул авалалда –
Аллагьасул баракат.
Адамидаса араб
ГIисаде гIунтIизегIан –
Халикъас хира гьавун,
Халкъалъе кьурав икъбал.
Я, Аллагьасул Сайид,
Сахаватав МухIаммад,
Нур тIоцебе бижарав,
Вижи ахирав Расул.
Салатгин салам дуде
Дур бицун хIалкIоларел,
ХIинкъарал лагъзадерил,
Дуде хьулгун ахIдолел.
Я, Аллагьасул Расул,
Зоб-ракь жиндий бижарав,
Вижарасе мукIурав,
РакIбацIцIадав авараг.
Аллагь цо вукIин ракIчIун,
Авараг ритIухъ гьавун,
Гьабулеб нижер гьари –
Гьабе Бичасде щвезе.
Я, Аллагьасул Сайид,
Суннат бацIцIадав ХIабиб,
РухI бахъулеб къояца
Къаданив чIа нижеда.
Аллагьасе диналъе
Дагьал ниж загIиплъунан,
Зияраталъ рачIарал
Ниж дуца рехун тоге!
Я, Бичасул Авараг,
АсхIабзабазул «Аман»,
Аят рикIкIун Къуръангун
Баркат щваяв, мун ШапигI,
ШапагIаталъ росизе
Рес балагье нижее,
Расуласул агьлуян
Аллагьас рижун ругин.
Я, Аллагьасул Расул,
Аллагьасе хирияв,
Хвалил кьогIлъи бигьаяб
Гьабе дуца дур уммат.
Алжаналъул кавабахъ
Квалквал букIунгутIизе –
КантIизаре дуца ниж
Дунялалъул рокъорго.
Я, Аллагьасул Расул,
Русулазул кIудияв,
ЖужахIалъул цIа хъвазе –
ЦIуне дуца нижер черх.
Куръан-хIадис хиралъун,
Халикъасе мукIурлъун,
РакIги мацIги бацIцIадаб
Давла кьезе квербакъе.
Я, Аллагьасул Сайид,
Суннат берцинав инсан,
Сабаблъун нижей кьурав
КьучIаб исламалъул нур.
Рикъзи-мал хIалалаб кьун,
ХIарамлъи биччачIого,
ЦIуне дуца дур уммат –
Аллагь разияб нухда.
Я, Бичасул Авараг,
Къуръан рещтIарав ТIагьа,
ТIабигIат-гIамал дуца
Релълъинабе нижерги.
Нажасаб илбисалъе
Ургьибе нух къалехъин,
Кье нижей дуца иман,
Аллагь разияв, Сайид.
Я, Аллагьасул Расул,
Мисалалъе вижарав,
Рижи бусурбан гьабун,
Гьабе дуца дур уммат.
Умматалъе ритIухъав,
ТIагьаясул нухалда
ТIоритIе, Аллагь, дуца,
МухIаммадил махлукъат.
Я, хIалимав БетIергьан,
ХIалкIолев нижер Аллагь,
ХIабибасул байрахъгун
Рахъинаре дуца ниж.
