Дир хIежалъул гьалмагълъи

Ассаламу гIалайкум, дир хIежалъул гьалмагълъи,

ХIежгун гIумраги тIубан Дагъистаналде щварал.

Аллагьасул хIалкIвеялъ, Адамгун ХIавадасан

Инсан жинца вижараб ракьалда хIетIе чIарал.

Ассаламу гIалайкум, дир хIежалъул гьалмагълъи,

Мадина шагьаралда зияратал тIурарал.

ХIабибуллагь вукъараб Равзаялда берчIварал,

Расуласул мажгитахъ кIикъого как тIубарал.

Ассаламу гIалайкум, диналъул вацал, яцал,

БакъигIалъул хабзалахъ Шамилий салам кьурал.

Аллагьасул Расул ккун, исламалъе рухI кьурал,

Ункъавго асхIабасе гIодой къулун гIодарал.

Ассаламу гIалайкум, даимаб къотIи гьечIеб,

КIочонареб сапаралъ Маккаялда рещтIарал.

ХIажул Асвад цIунараб, Къилбаялда берчIвараб,

Гьениб тIавафги гьабун, гIумра тIубан руссарал.

Сафагун Марваялда сагIю тIубараб гIадин,

ТIубайги рекIел мурад кIиябгоги рукъалда.

Аллагьасул хIалкIвеялъ Къуръан-хIадис рещтIараб,

ГIарабустан ракьалда баракат щун рохаги.

Ассаламу гIалайкум, хириял хIажизаби,

Зам-зам лъеца рацIцIалъун, игIтикъат камиллъаги.

Кинабниги зиярат гьабурабщинаб дугIа,

Аллагьас къабул гьабун мурадалде нуж щваги.

ГIайшатбика ГIабдулкъадирова, МагIли росу