РачIа свалат битIизе
РачIа, диналъул агьлу,
Авараг кIодо гьавун,
Гьев гьавураб моцIалъул,
ЦIикIкIун хIурмат гьабизе.
ХIабибуЛлагь гьавураб,
РабигIул -аввалалъул,
Адаб гьабун хьвадизе,
Бегьараб яхI бахъизе.
Бичасул Расул веццун,
Берцинаб хIалкъай гьабун,
ХIалкIвараб свалат битIун,
ТIагьа рази гьавизин.
Умматалъул ургъелгун,
Дунялалде вачIарав.
Дунивал тун унелъул,
Ургъел добго букIарав.
Доба, ахираталда,
Умматалъе шапагIат,
Аллагьасда гьаризе,
Гьесда гуреб кколаро.
Гьединав Расуласде,
Салават битIичIого,
Бегьиларо хьвадизе,
Бусурбаби ругелъул.
Нилъер салаваталде,
Расул хIажатав гьечIо.
ХIажалъи гьелде бугел,
ЗагIипал нилъго руго.
Щиб хIалалъулъ нилъ рукIа,
Рилълъун унел, хIалтIулел,
ХIузур рекIелъ гьечIого,
Гьединго хивалазулъ.
Хирияв Расуласде,
БитIараб нилъер свалат,
АнцIул цIикIкIине гьабун,
Гьабула Бичас къабул.
Къиямасеб къоялда,
Аллагь гурхIи бокьани,
БитIея, бусурбаби,
Расуласде салават.
Расуласул шапагIат,
Щвезе хьуллъуралщиназ,
Щибаб къойил салават,
БитIизе жигар бахъе.
