Рузман къо
Рузман къо
Рузман къоялъул баркат киназего щолила,
Щулияб рукнуялда Аллагь кIочон течIезе.
Хирияв ХIабибасде свалат гIемер битIани,
ТIолго мунагьаздаса тIаса лъугьин гьарани.
БитIе, диналъул агьлу, Хириясде салават,
Иманги щула гьабун, Аллагьги ракIалда ккун.
Гьелдаса жиб бигьаяб щиб бугеб гьаб ракьалда,
Гьелдаса жиб хирияб батизе щакаб буго.
Гьаб хIасратаб дуниял дуе бакълъун кунчIизе,
Доб къваридаб хобалъуб дуего нурлъун чIезе.
БитIе, яцалгун вацал Аварагасде свалат,
СиратIалъул кьо дуйго шагьранухлъун букIине.
