Заназул росу

Лъалхъе бусурбаби, нуж хабалазда,

Хивалал бечедго ругонаниги.

Гьанир рукъаразе къватIибе нух гьечIо,

Ракьда хьибилги цун регун чIей гуреб.

Гьанир нилъер херал умумул руго,

ГIумру жибго тарал гIолилал руго.

Лъимал бесдал тарал улбулги руго,

Щибго жо бичIчIичIел гIисинал руго.

Гьанир гIалимзаби – ралъадал гIадал,

Гьанир хIакимзаби – цIва борхат ккурал.

Гьанир ахIмакъзаби – гьанир залимал,

Киналго хIебтIулеб лахIтуялъул рукъ.

Квешлъи гьабурасе жазаялъул рукъ,

ЛъикIлъи гьабурасе алжаналъул рукъ.

Къваридав, пашманав лъазе кIолареб,

ГIазаб-гIакъубаде кумек щолареб.

Лъалхъе, бусурбаби, нуж хабалазда,

Хазиналъун ккоге дунялалъул рукъ.

Аллагьасул хIукму, Бичасул къадар,

Ахир нилъ руссунеб заназул росу.

ГIайшатбика ГIабдулкъадирова