ХIажизабазул моцI

ЛъагIалида нур балеб,
ГIумруялъ кIочонареб, 
МархIаба, хIажиязул, 
ХIасраталъул цIураб моцI. 
ИнчIезда бичIчIулареб, 
Аразда кIочонареб,
МашаАллагь, рекIел тIинда, 
Рукъ ккун букIунеб асар. 
Бичасул ахIиялде, 
АхIун жаваб гьабурал, 
ХIажизабаз бачунеб, 
Лабайкадал берцинлъи.
Аллагьас тIаса рищун, 
ХIеж-гIумра насиблъарал, 
ХIажизабазул къукъа, 
Къасдал тIубараб агьлу.
Равзаялда Расулгун ﷺ
ДандчIваялъ ракI хIеккарал.
 ХIажизаби, нуж гурищ, 
Гьаб ракьалда талихIал?
Саназ рекIелъ баккараб, 
Берцинаб, добе рокьи, 
ТIегьан тIад пихъ бижарал, 
Нуж гурищ, хIажизаби?
ХIабибасде ﷺ балаялъ, 
ГIищкъудул къуват щварал, 
Щун ТIагьахъе ругелъул, 
Гьеле нужее баркат.
Баракатаб, хирияб 
Ясрибалде рачIиндал, 
ЧIалгIараб дирги рекIел, 
Бице урхъараб салам.

Парихан Мажидова,Казбек район, Гуни росу