КантIизаре, Аллагь ﷻ

Бицараб гIоларо гIадамас рагIи,
Бицараб рагIуда нахъа чIечIони.
Гьабураб гIоларо чидае къотIи,
ТIубазе ниятгун гъорлъ лъугьинчIони.
АхIарал гIоларо гьоболлъухъ чагIи,
Гьоболасул адаб кквезе лъачIони.
Гьабураб гIоларо чидай гьоболлъи,
РакI бацIадаб ният дур гьечIонани.
Босараб гIоларо чидахъа налъи,
Налъи тIубазелъун мун къеркьечIони.
Бегьараб гIоларо кумекалъе квер,
БадибчIвай гьабизе хивал кканани.
Вуссарав гIоларо мун гIадамасде,
Дурго хьулал тIуран ракI буссанани.
Гьабураб гIоларо берцинаб гIамал, 
Гьелда хадуб квешлъи гьабун анани.
Абураб гIоларо берцинаб рагIи,
Гьабулеб пишаялъ инкар ккунани.
Банилан гIоларо къойил щуго как,
ГIадамасул керен дуца лъукъани.
Кьунилан гIоларо дуца садакъа,
Рихьдае гьабулеб гIамал бугони.
Бицунин гIоларо доб сабруялъул,
Балагь рещтIаралъуб гьабичIонани.
Киналго гIузраби чорхолъа унел,
Гьабулеб гIамалалъ гIибадат ссунел.
ГIамал бихьун балагь тIаде бачIунел,
КантIизаре, Аллагь, гьал ниж киналго.

ПатIимат ГIабдулаева