Дицаги баркула бусурбабазда

Дицаги баркула бусурбабазда
Бищунго хирияб гIидалъул байрам!
Цингиги гьарула БетIергьанасда
Къабул гьарейилан хъурал къурбанал!

Хириял къояца ккурал кIалазул
Рамазан моцIролгIан цIикIкIаги кири!
ГIидалъул каказул щибаб хIарп рикIкIун
ХIеж борхарабгIадаб щваги баракат!

Хъураб хIайваналъул щибаб рас рикIкIун
Росе, ТIадегIанав, тIаса балагьал!
Бидул къатIра рикIкIун, къудратав Аллагь
Гьарула чуреян нижер мунагьал!

Бачараб такбиргун, садакъа-къулгьу
Къварилъи нахъчIвалеб сангарлъун чIаги!
Хириял къоязул лъикIал гIамалал
ГIасиял кантIизе мисаллъун ккаги!

Дин-ислам цIунизе рухIгин-жан кьолел
Кьеги нужой талихI, тайги нуж роххун!
ТIолго бусурбаби цолъизаризе
Кьеги нужой къуват, къин гьечIеб сабру!

ИГЬАЛИСА МАГЬДИ