Цоги сон ана
Гьале тIаса ана цогиги лъагIел,
Лъалеб гьечIо хадуб щиб ккелебали.
Рагъул, кьалул балагь тIасаги босун,
Баркатгун, рахIматгун бачIун батаги.
Рагъда ругел васал рокъоре рачIун,
Эбел-инсул ракIал парахалъаги.
РакIал рохун таги, рукъ роцIцIун таги,
Иман, ияхI бугел лъималги кьеги.
Гьаб ахираб заман, ахирал къоял,
Аллагь гурхIичIони щибдай гьабила?
Херал-бахIаралин батIалъи гьечIеб,
ГIумру бугин нилъей Аллагьас кьураб.
Холел-унел чагIи рихьананиги,
Дунго холеб гIадин дир ракIги гьечIо.
Херлъун йигеблъиги бихьулеб буго,
Амма кантIуларо дир гIадалаб ракI.
Араб гIумруялде дир дагIба гьечIо,
БацIцIадаб, хIалалаб магIишат кьуна.
Чорхой сахлъи кьуна, рукъ роцIцIун тана,
МагIишат берцинаб хъизам букIана.
Ахирзаманалъул гIиссинал тIанчIи,
Гьезде рокьи цIикIкIун гьарделей йиго.
ТIанчIазе дугIагун квербакъиялъе,
ГIажалалъе сабру кье, Аллагьилан.
