БачIун щвараб заман
БачIун щвараб заман
БачIинилан бицараб
БачIинаро хIинкъараб,
БачIун щвана мун тIаде
Огь, чорокаб нахъзаман.
Кето-гIункIкIалда гьоркьоб
Гьудулъи щулалъараб,
Эбел-лъималазда гъорлъ
Тушманлъи гIемерлъараб.
Мадугьаллъи, гIагарлъи
Жидеда кIочон тараб,
Гъурщил гурони къимат, -
Цоцазул гьабулареб.
Руччаби-ясаздаса
Ничалъул пардав араб,
Эбел-инсуда данде
Лъималаз квер борхараб.
Рос-лъадуда гьоркьобцин
Нич букIунаан цебе,
Гьанже гIолеб гIелалда
Бугищ гьеб нечолеб бакI?
Бащдаб къаркъала бихьун
РетIа-къарал ясалги,
Щортикалги тIад ретIун
КъватIахъ гIолохъабиги.
Эбел-эменги гьечIо
Лъималазде регIулел,
Бокьухъе гIун рачIаян
Тун руго гьанже лъимал.
ЛъикIаб-квешабги малъун,
Мунагь-хIакъги лъазабун,
Аллагь разилъуледухъ
Бугищха гIадлу кьолеб?
Кколел аварияби,
Гъурулел гIолохъаби,
Рукъулел жаназаби, -
Ругищха нилъ кантIулел?
Бадиб килищги тункун
Мунилан абизегIан,
Церехун ругел рихьун
КантIулел чиго гьечIо.
Росасул адаб бугел
Руччаби дагьлъун руго,
Эбел-эмен разиял
Лъимал къанагIат руго.
ГIакълугин иман кьеги
ГIун бачIунеб гIелалъе,
Аллагь разияб хIалалъ
Исламалъул нух кквезе.
КантIизе гIакълу кьеги,
Гьезул эбел-инсуе,
Дунял-ахираталъул
Жавабчилъи тIад бугел.
