Муфти КIудиясде
Муфти КIудиясде
Балагье, гIолилал, гIинтIаме, вацал,
Ахирзаманалъул гIаламат бугин.
Цо вугев амир тун тарарал васаз,
Улка бикь-бикьизе жигар бахъулеб.
Амирул муъминин имамул уммат,
Нилъер муфти вуго хIакъав муршидлъун.
Гьесде жахIда бугел хIал хъубал васаз,
Месед мекъаб букIин чIезабулеб куц.
ГIажаиблъизеги ккараб жо гуро,
Питнаби гIемерал рукIине руго.
Жагьилчияс зарал гьабизе гьечIо,
ЦIалунчияс буго дин хвезабулеб.
АхIмад-хIажи устар, нижер цевехъан,
Жиндирго ургъел тун нилъей ракI кьурав.
Дур нух ХIабибасул Бичасде щолеб,
Дуда нахъчIанани нижги хIакъалда.
ХIалихьатас какун мун дир бадиве,
ЧIегIерлъизе гьечIо, кунчIун гурого.
Беццас гьечIин абун бакъги ссунаро,
ГIинкъас дагIба банин гьаракь къунаро.
Ахирисеб хIухьел битIун бокьарас,
Кквейин абе щула иршадалъул нух.
Ла илагь илла Ллагь - ахир хIухьлада
Абизе бокьани, кквей муршид дуца.
Хвасарлъиялъул нух жакъа заманалъ
Муфтиясул нухда - муфтият буго.
Гьеле «НухIил гама», раха нуж тIаде,
Питнаялъул «тIупан» тIаде щвелалде.
