Бице Устарасда, АхIмад-хIажида

Бице, КIудиясда-АхIмад-хIажида,
Дир урхъараб салам,ГIисал рахъалъан.
ГIемер гьев хирияв,гьесул ракьцояс,
Кьолеб адаб бугин,адаб таниги.
Бице, гьесул ракьда ритIухълъиялъул,
Бакъул чIорал гьанже речIчIанин абун.
ТIад вугев Бичасул кумекги бачIун,
Канлъи бугин щолеб рогьалилъ гIадин.
Бице,БетIергьанас гьев сабаблъун ккун,
Ислам-дин тIегьанин Дагъистаналда.
ЦIодораб, хIеренаб гьесул каламалъ,
Киназулго ракIал тIаде цIцIан анин.
Гьесул муридазул зикру-свалаталъ,
Унтараб Дагъистан сахлъулеб бугин,
Сас гьечIого унеб гама гIадинан,
Унеб бугин цебе диналъул гама.
Бице, рузман къоялъ Дагъистаналда,
Мажгитал цIун ругин Дагъистаналда.
Къудраталъул кумек щвечIеб анани,
Гьаб рахIмат нилъее бачIинароан.
Абе, гьес баркатаб   нухмалъи гьабун,
Баркат щун Дагъистан тIегьалеб бугин,
ТIолго Россиялда ислам-диналъул,
Гьесул муридзабаз нур балеб бугин.
Абе, рецги гьабун кIалъалев гурин,
КIудияб балъголъи рагьулев гурин.
Дирго ракI чучулев чи гьев вукIиналъ,
Чучулел рукIанин рекIел пикраби.
Абе, КIудиясда тIаса лъугьаян,
ГIузраби гIемерав мурид ГIисада.
Гьесде дирго бугеб рокьи бикьулев,
Муридасул ккарал гъалатIаздаса.
Абе, гьесда дугIа камун тогеян,
Киналго муридалъ жагьилав дийги.
Жив хиралъун хъвараб дир назмуялда,
ТIаса лъугьа абе, АхIмад-хIажида.
Бице дир урхъараб салам нахъеги,
Гьесул ракьцоясул ГIисал рахъалъан.
ГIибадат камилав,гIамал гьайбатав,
Гьудуллъи хирияв дир Устарасда.

ГIиса Шарапудинов, Гумбет район, Игьали росу