Салам магIарулазде

Ассаламу гIалайкум, магIарулазул улка,

Борхалъи тIаса бищун тIавап гьабулел цIумал.

ЦIарги, бахIарчилъиги, гьунарги кодоб кьурал,

Камиллъиги намусги наслабазухъе щварал.

Ассаламу гIалайкум, устарзабазул ватIан,

ГIаданлъиги иманги ургьиб жаниб бессарал.

Гьобол-гьудуллъиялъе хIурмат кIудиял вацал,

Унел зияратахъе нахъа чи толареб халкъ.

Ассаламу гIалайкум, гъазизабазул тIалъи,

Унтарал-щокъазухъе къо ккедал гочунеб халкъ.

Къварилъиги рохелги бащад гьабун къулчIулел,

Къуватги жанги кьурал, кьварарал магIарулал.

Ассаламу гIалайкум, бахIарзал рахъараб ракь,

Капурзаби гъурарал гъалбацIал гIадал васал.

Умумуца ханжарги харабаца тIамурги

ТIадегIанаб ракьалда кьурдизабураб уммат.

Ассаламу гIалайкум, мугIрузда гIураб къвакIи,

Къуръан каламалдасан кидаго кIал бичIичIел.

Буссунареб щар чIвачIел чIаголъи кьурал улбул,

Кьун батаги нужее абадиялъго алжан.

Ассаламу гIалайкум, умумузул ирсилал,

Кирилъун хъваги нужер жанибго цIунараб яхI.

ЦIобги баркатги лъеги, лъайги гIакълуги кьеги,

Кьурабщинаб садакъа къабулаблъун батаги.

Ассаламу гIалайкум, шайихзабазул свери,

Щваги нужер баракат кинабго гьаб халкъалъе.

РитIухъалда къвал базе, къабихIалда мал базе,

Бажари кьеги нужей, кьури гьечIеб щулатаб.

МУХIАММАД НУРМУХIАММАДОВ, ШАМИЛ РАЙОН, ТIЕЛЕКЬ РОСУ.