Макка-Мадина
Бихьизе берцинаб, ахIизе лъикIаб,
Макка-Мадиналъухъ хIасрат ккарай дун.
Авараг ﷺ гьавураб, гьев жанив гIураб,
Хираб Маккаялда рещтIен гьабуна.
Сафа-Марваялда тIаваф гьабуна,
ХIажрул Асвадалда убач гьабуна,
КагIбаялъул рокъор какалги рана,
Ясин цIалун Къулгьу дица гьабуна.
ХIеж-рукъалда сверухъ тIавафги гьабун,
ГIарафат магIарде тIадеги щвана.
ИсмагIил вегараб тIалъи бихьана,
Адам, ХIава чIараб гохIде яхана.
Муздалифалдаса чIинхал рищана,
Жамраталда чIинхал дица речIчIана.
Зам-замальул лъиналъ чурхдул чурана,
Авараг ﷺ гьавураб мина бихьана.
Хадижат эбелгун дандчIвай гьабуна
ГIаишатил мажгит, гIумра бухьана,
ГIаданлъи камилал, иман цIикIкIарал
ХIеж борхана дица гIарабиялгун.
ХIежалъул арканал камилги гьарун,
Хираб Маккаялде КагIба-рукъалъе,
Цинги хIеж-рукъалъе къо-лъикIги гьабун,
МугIрулгун щобазда дугIаги бухьун,
Гьенисан рилълъана ниж Мадиналде,
Хирав ХIабиб вугеб Равза бихьана.
Абубакар, ГIумар аскIор ратана,
Меседалъ къачIараб мажгит бихьана,
ХIамзат шагьидлъараб доб УхIуд мегIер,
Гьенире тIадеги сапар бухьана.
Гьев жанив вукъараб къабро бихьана,
Шамил имам вугеб авал батана,
ПатIиматгун лъимал аскIор ратана,
Аллагьасул ﷻ амру бацIцIад тIуралел,
ХIабибасул суннат гьоркьоб толарел,
Гьардаралдай Аллагь дол гIарабиял.
Я гьаб дунялалъул берцинлъи гьениб,
Цинги дунялалъул бечелъи гьениб,
Алжанул махI бугеб гIарабазул ракь,
Бихьзе хъван батаги хьуллъунщиназда.
Хираб равзаялъе къо-лъикI гьабуна,
БакъигIал хобазе бетIер къулана.
Хабал агьлуялъе дугIаги гьабун
Мадинаги тана лъикI букIайилан.
