Акабирал жинхъе рачIунев
Аллагьасде ﷻ щезе анищ бугезе
Анжиялда вуго, рачунев далил
Устарасул баркат къваригIаразе
Къалъараб бакъ вуго АхIмад Афанди.
Эсул машрабалъул къимат лъалезе
Къунареб ицц вуго зам-зам гIадинав
Гьекъезе бокьарал муридзабазе
Маул хIаят вуго бахIру гIадинав.
Магьди Имамасда тIубазе бугеб
ТIарикъатги эсда божараб буго
Божи бугелаца нилъей рицарал
Биценазулъ элде тIоритIел буго.
ТIагьал наслуялда насаб хурхарав
Халифа эв вукIин хIакъаб жо буго
ХIакъикъат бокьичIез щиб бицаниги
Щибго эсий ккезе нукъсанлъи гьечIо.
Нилъер икълималда рекъел цIунизе
Эсул фирасаталъ хассаб бакI ккола
Ракълида Дагъистан теларин чIчIараз
ЧIорал кинацаго эсда речIчIула.
Кинабгоги хIехьон ццевехун ине
Аллагьас ﷻ эсие къуват кьун буго
Къуват эсул холин хивал букIарал
Халкъалда сурана дунялалдаго.
Динияб идара бокьулареца
Бугьтан гIемер лъуна гIалимзабазда
Муфтият рихарал хиянатчагIаз
Харбал тIиритIана гьерсал гIемерал.
Бокьарас-бокьараб бицеян абе
Бокьарас-бокьараб гьабеян абе
Гьабураб бицараб кинабго хъвалел
«Катибайни» ругел щивасда цадахъ.
Щивас кьелеб жаваб бичасда цебе
Бугьтанал лъуразги, мацI гьабуразги
МацIго гьечIел лугбал кIалъалеб къоялъ
Къунеб нужер талихI - нуж гIедегIуге!
ГIалимзабийилан цIар бугелаца
ЦIадабе халкъ балеб ахир замана
Аллагьас ﷻ рачайги битIараб нухде
Нухда мекъи ккелин хIинкъаралщинал.
ХIакъикъат бокьарал - батизе кIвечIел
Бица-бицаралда божун рукIунге
Божи бугелщиназ даим веццарав
Динияв цевехъан щивали цIехе.
Щайихзабаз жиндий нугIлъи гьабурав
ГIелму-гIамалалда гIалам мукIурав
ГIакълуги камилав, калам дурусав
Киналго тIад рекъон муфтилъун тарав.
ТIолго исламиял улкабаздаса
Акабирал жинде тIаде рачIунев
РачIанщиназ жиндир хIурмат гьабулев
ХIикматазул ралъад АхIмад Афанди.
Эсул тадбиралда дин тIибитIичIеб
Дунялалда гIемер бакIго хутIичIо
БакI-бакIалъ ракарал чирхъазул гIадаб
Чанги гIалимасул мисалги буго.
Мисаллъун босизе гIолеб гурони
ГIамал Муфтиясул цониги гьечIо
ГIибрат жаниб бугеб калам гурони
Кидаго эсдасан бицун рагIинчIо.
Дунялалда бугеб Алжанин ккола
Анжиялда жаниб бугеб цо тIалъи
ТIогьол махI бахъараб авлахъин ккола
МахIачхъалаялда бугеб цо свери.
