ЛъикIай чIужуялъул мисал
ХIасанул Басрияс бицун буго: «Цо нухалъ Маккаялда вукIаго базаралде щведал, ретIел босизейин абун, ххам бичулев чиясда цеве лъалхъана.
Багьа-танга цIехон даран гьабулев вукIаго, базарган лъугьана дие Аллагьасул ﷻ цIаралдалъун гьедун, къайи беццизе. Гьесул къайи бецци бихьун дица босизе ракIалда букIарабги тун, цогиясда аскIове ун, гьесухъа босана.
Гьелдаса хадуб чанго сонги ун хIеж гьабизелъун цIидасан Маккаялде щвана дун. Цебесеб нухалъго гIадин хIажатаб босизе базаралде щведал, дандчIвана довго базарган. Гьаб нухалъ абуни дида гьесул къайи беццулеб ва лъикIаб бугин чIезабун Аллагьасдалъун ﷻ гьеди халлъичIо. Гьелда хIикмалъарав дица базарганасда цIехана: «Мун гурищ дов цевеги гьанив къайи бичулев вукIарав, бичулагоги Аллагьасул ﷻ цIаралдалъун гьедун даран гьабулев вукIарав чи», - ан.
Базарганас абуна жив вукIанин абун. Дица цIехана: «Щибха ккараб, сунца мун хисизавурав, гьаб нухалъ дида мун къайи беццулев ва Аллагьасул ﷻ цIаралдалъун гьедулев вихьулев гьечIо», - ян.
Жаваб гьабун гьес абуна: «Цее йикIарай дир хъизан йикIана, дагьаб гIарац рокъобе бачIани, рази гьечIолъи бихьизабулей. ГIемер щвани, гьебги гIоларого гIамал квешлъулей. Хвел тIаде щун Аллагьас ﷻ гьей нахъе ячиндал дица цоги лъади ячана. ЦIияй ячарай йиго гIамал берцинай. Щибаб нухалъ дун къватIиве унелъул, гьелъ дир ратIлил рагIалги ккун абула: «Я пулан, мун Аллагьасукьа ﷻ хIинкъа, хIалалаб нухалдалъун щваралдалъун гурони дуца нижги кваназаруге. Дагьаб гурони хайир ккечIого мун вачIаниги, нижеца гьеб гIемераблъун рикIкIина», - ян.
