ЦIалдолезул пикраби
Газеталъул ахирисеб номералда кьун букIана «Рокъор лъималгун магIарул мацIалда кIалъалищ нуж? Гьелъул кинал пайдаби рихьулел» - абураб суал. Гьелъие рачIарал жавабал кьолел руго гъоркьехун:
МагIарул мацI - рахьдал мацI. Гьеб мацIалдагIан бацIцIадго пикру загьир гьабизеги кIоларо. Умумузул яхIги, махIги, гъинги бессун букIуна гьелъулъ.
Кидаго магIарул мацIалда кIалъала.
Рахьдал мацI кIочене бегьуларо лъидаго. Гьеб буго хазина.
Рокъоб лъималгун магIарулалъ кIалъаларев вихьизеги вокьуларо.
КIалъала, мацI кIоченчIого букIине.
Лъималгун кIалъаялъ гьезда жидерго рахьдал мацI лъала ва чIахIиязе рохел букIуна.
Гьеб буго умумузул адаб цIуни. ТIоцебесеб классалда ругел лъималаз магIарул мацI лъаларин абидал ракI унтула.
МацI буго миллат, мацI тIагIани миллатги тIагIуна.
ТIубанго эбел-инсуда лъазе ккола цин кIалъазе ккани.
КIалъала. ГIурусалъ кIалъазецин толаро лъимал.
МагIарул мацIалъ лъималгун кIалъачIони рахьдал мацI гьезда кIочон теларищ!?
КIалъала, амма пайдабазда тIад жеги ургъичIо
Хадусеб номералъе суал «Кинал нигIматал гIезарулел нужерго ахал-хурзабахъ?»
РокъоргIаги кIалъачIони тIубанго кIочон тезехъин буго лъималазда рахьдал мацI.
Дица лъималазда магIарул мацI гурони малъулеб гьечIо. ГIурусаб къваригIани гьез жидецаго тIалаб гьабила. Амма гIурусабги гьечIого гIезехъин гьечIо, гIурус ракьалда ругезе.
Дун гIурус ракьалда гIуна, амма хъвазе лъикIго лъачIониги бицине лъала, алхIамдулиллагь. Лъимал нилъерго гьанир гIуна, гьезда лъала, рокъобги магIарул мацI гуреб бицунаро.
Гьанже ругезда кколеб буго гьитIинго малъичIони гIураб къоялъ лъималазда гIурус мацI лъаларин, гьелъ рокъобги бицунаро магIарул мацI. Дида ккола, эбелинсуца гьитIинго малъичIони, рокъобги бицинчIони магIарул мацI хадубккунги лъаларин абун.
МагIарулал магIарул мацIалъ кIалъачIого щиб мацIалъ рокъор лъималазда кIалъалел?
МацI кIочарасул цIарги кIочонин абула, гьелъ лъималазда бицине ккола умумузул мацI.
МагIарухъа рачIарал нилъеца лъималазда нилъедаго лъалеб гIурус мацI бицине лъугьани, я гIурус, я магIарул щвечIого хутIизе рес буго гьел. Рокъоб умумузул мацIги бицун лъимал нужеца гIурусаб школалда тIалаб гьабизе те.
Дунги хъизанги жеги гIурусалъ рокъор лъималазда кIалъаларо, кидаго магIарул мацI бицуна.
10 соналъ цебе лъимералъ рокъоб цо-кIиго рагIи гIурус мацIалъ бициндал эбел-эмен рохулел рукIана, ай гIурус мацI лъималазда къанагIатго гурони лъалароан. Амма гьанже гIурус мацIалъ гурони кIалъалелго гьечIо. КIудиябго хIинкъи буго рахьдал мацI тIагIиналда. Жакъа лъималазда рахьдал мацI дагьаб гурони лъалеб батичIони, гьезул лъималазда гьеб тIубанго лъаларо.
Цебе нижер школалда гIурус мацIалъ кIалъалев чиясда тIад релъанхъулаан, гьанжейин абуни гьелъул гIаксалда буго. Рахьдал мацIалда кIалъаялъ гIемерал пайдаби руго, амма гIурус мацI лъачIого лъималазда хутIиларо.
