Как ахIиялъул баян
Как ахIиялъул баян
ТIадегIанав Аллагьас бусурбабазда къойил щуго как тIад гьабидал ва бищун лъикIаб гIамаллъун гIужил авалалда жамагIат гьабун как байги гьабидал, гьел цIакъ хIажалъана киназдаго, гьеб какде ракIарулел рукIин лъазабиялде. Гьеб суалги гьоркьоб лъун Аварагас асхIабзаби ракIаридал, батIи-батIиял пикраби загьир гьаруна, амма цонигиялда Авараг разилъичIо, цого-цо лъица бугониги ахIилин гьел какде абураб жоялда гурого. Гьеб абулезул цояв вукIана ГIабдуллагь бину Зайд.
Абу-Давудица кьучIаб иснадалдалъун бицана ГIабдуллагь бину Зайдидасан, гьес абунин: «Аллагьасул Расулас амру гьабидал какде гIадамал ахIизе, кодоб цIумурги ккун цо чи вихьана дида макьилъ. Дица абуна гьеб цIумур дие бичеян абун. Гьес гьикъана сундуе гьеб къваригIун бугебилан. Дица абуна какде гIадамал ракIаризе хIажат бугин. Гьес абуна дица дуда гьелдасаги лъикIаб малъилин.
Дица абуна малъеян. Гьес малъана как ахIулеб куц. Радал дица Аварагасда бицана дидаго бихьараб макьу. Гьес абуна: «Гьеб лъикIаб макьу буго. Дуца гьеб Билалида малъе, гьесул гьаракь борхатабги берцинабги буго», - ян. ГIабдуллагьицаги малъун Билалица как ахIана. Гьебго жо макьилъ бихьун ГIумар-асхIабги вачIана. Гьебго жо анцIгоялдаса цIикIкIун асхIабасдаги бихьанилан буго. ТIадежоялъе, как ахIулеб куц малъун хирияв Аварагасухъе вахIюги рещтIана. Гьеб вахIю аслулъунги ккана как ахIиялъе. Жакъа къоялде щвезегIан гьедин как ахIун ракIарула гIадамал какде ва лъазабула какие заман щун букIин. («ФатхIул гIалам», бутIа 1)
АРСЛАНГIАЛИ ГIУМАРОВ
