Гьикъизе нечараб бицине намусаб
Мадугьалзабазул лъимер...
Цо тIалаялъ тIадехун ругел цIиял мадугьалзабаз дун махIрум гьаюна кинаб букIаниги парахалъиялдаса. Гьезул лъимер гьоркьоса къотIичIого гIодула яги къаси цо тIубараб мехалъцин бекерахъдула, дванкола. Гьединаб хъуй букIаго хIухьбахъизе санагIалъи букIунаро. Дица гIарз бахъараб мехалъ, мадугьалзабаз абула киналго лъимал рукIунин гьединалилан абун.
ГI., Гъизляр
ГIалимчиясул жаваб
Мадугьалзабаздехун лъикIаб бербалагьи гьаби, гьез цо-цо мехалда нилъее гьарулел санагIалъаби гьечIолъабазде сабру гьаби ккола нилъер иманалъул хIалбихьи гьабилъун.
ГIабдуллагь ибн ГIумарица бицана Аллагьасул Расулас ﷺ абунин: «Жибрил малаикас дие гьоркьоса къотIичIого насихIат гьабуна мадугьаласдехун лъикIаб хьвада-чIвадиялъул хIакъалъулъ, хIатта дида ракIалдецин ккана гьес гьев дир ирсилавлъун гьавилин абун», - ян (Бухари, Муслим).
Мадугьалзабазе лъикIлъи гьабуралъухъ нилъее кири кьезе рагIи кьун батани, гьез гьарулел санагIалъаби гьечIолъабазде сабру гьабуралъухъ кири жеги цIикIкIараб букIуна. Гьединлъидал кIвар бугеб жо ккола, бокьараб ахIвал-хIалалда, гьоркьоблъи цIуни, захIматаб заманалда мадугьалзабазе кумек ва квербакъи гьаби.
Гьединго, кIвар бугеб жо ккола мадугьаласул адаб гьаби, гьесул миллаталде яги диналде балагьичIого. Абу-Гьурайратица бицана, Аварагас ﷺ абунин: «Валлагь, мадугьал жиндир квешлъиялдаса цIуничIев чиясул иман камиллъичIо», - ян (Бухари, Муслим).
Гьединлъидал сабруги гьабун, хIаракат бахъизе ккола мадугьалзабазда цадахъ цо нух балагьизе. Лъималазе битIараб тарбия кьейги эбел-инсул жавабчилъиялдасан ккола.
Гьеб лъимадул эбел-инсуеги батизе рес буго захIмалъи. Гьединлъидал, дагIба-рагIи гьабичIого, цадахъ рекъон цо нух балагьани лъикIаб букIина.
Психологасул жаваб
Гьединаб ахIвал-хIалалда рекъараб хIал батизе захIмалъула. ГIемерисел гIадамазе рахIатхвей гьабула мадугьалзабаз, хасго ремонталъулал хIалтIаби гьарулеб мехалда. Амма гьаниб лъимадул бицунеб бугелъул, рес буго дуда бугеб хIал мадугьалзабаздаги бичIчIулеб батизе, амма гьеб хисизабизе кIоларого рукIине. Гьединлъидал, хIаракат бахъе дагIба гьабичIого чIезе. ДагIба гьабуни, ахIвал-хIал жеги квешлъизе рес буго.
ХIеренго гьаре мадугьалзабазда, лъимер, къаси кватIараб мехалъ, бекерахъдизе, кIанцIезе биччагеян. ЦIакъ кIвар бугеб жо ккола ццим бахъине биччачIого кIалъай. ГIемерисел гIадамал мухъде рачIуна берцинаб каламалдалъун кIалъани.
Мадугьалзабаз дур гьари тIубанго кIвар кьечIого толеб батани, бегьула юристасда дандбазеги.
