Жаваб кьезе ккола
ТIадегIанав Аллагьас заман кьун буго щивав инсанасе. Амма киназго гуро пикру гьабулеб кин гьеб тIамулеб бугебин абураб суалалъул. Къоял уна, сонал уна, гIемерисеб мехалъ инсанасда бичIчIуларо кигIан къиматаб заман жидеца гIадада хвезабурабали.
Имам Гъазалияс «Бидаятул Гьидаят» абураб тIехьалда кIвар буссинабулеб буго заманалдаса битIун пайда босиялде. Гьес гIадамазе насихIат гьабула жидерго къо гIуцIизе - рахъараб лахIзаталдаса байбихьун кьижизегIан - жидерго заман пайдаял ишазе ва ТIадегIанав Аллагьасе гIибадат гьабиялъе кьезе хIаракат бахъулаго.
Жакъа заман гIадада хвезабиялъе аслиял гIиллабазул цояблъун лъугьун буго телефон ва социалиял гьинал. Инсанас сагIтал разе бегьула видеороликазухъ балагьун, хабар цIалулаго яги гIадада гара-чIвари гьабулаго. Амма, какил заман щвараб мехалъ, циндаго гьезде «цIакъго машгъуллъун» ратула. Гьез как нахъбахъула бищунго ахирисеб гIужде щвезегIан.
Щай нилъеда нилъерго телефоназде тIаде къулизе сагIтал ратулел, амма нилъерго Халикъасе гIибадат гьабизе цо-кIиго минутцин батизе къеркьоларелали пикру гьабизе заман щун гьечIищ?
ТIадегIанав Аллагьас ﷻ Къуръаналда абуна (магIна): «Аллагьасе ﷻ балеб как буго жинца инсан къабихIаб жоялдаса нахъчIвалеб, гьев шаргIалда какараб жо гьабизе гьукъулеб», - ян (сура «Ал-ГIанкабут», аят 45).
Как гIицIго тIубазабизе кколеб парз гуро. Гьеб ккола лагъасдаги гьесул БетIергьанасдаги гьоркьоб бугеб рухIияб бухьен. Какалдехун цIодорлъи гьабулев чиясда, гьеб заманалда ва ракIбацIцIадго гьабизе хIаракат бахъулесда жаниб иман щулалъула.
ГIумру хисизабиялъул иш байбихьула жиндасаго. КIвар гьечIого гIумру гьабулеб мехалда, жиндирго ахIвал-хIал лъикIлъиялде хьул лъезе бегьуларо. ТIадегIанав Аллагьас абун буго (магIна): «Аллагьас ﷻ халкъалда бугеб лъикIабниги квешабниги хIал хисизабуларо, гьеб халкъалъ жидецаго жидерго хIал хисизабун гурони», - ян (сура «Ар-РагIд», аят 11).
Гьединлъидал нилъеца халгьабизе ккола нилъерго гIумруялъухъ. Нилъеца радал байбихьизе ккола Аллагь ракIалде щвезавиялдалъун, какал жиндир заманалда ран, Къуръан цIализе, пайдаяб гIелму щвеялъе, лъикIал гIамалал гьариялъе заманги биччазе ккола. ГьитIинал, амма гьоркьоса къотIичIого гьарулел хиса-басиязцин дагь-дагьккун инсанасул гIумру хисизабизе бегьула.
КIочон тезе бегьуларо араб заман нахъе буссинабизе кIолареблъи. Щибаб унеб къоялъ нилъ гIагар гьарула ТIадегIанав Аллагьасулгун дандчIваялде. Цо къоялъ нилъеца жаваб кьезе ккезе буго нилъее кьураб гIумруялдаса кин пайда босарабин абураб суалалъе. Гьеб къоги рикIкIад гьечIо.
