Баркала сахаватал гIолохъабазе
Дун вуго 2012 соналдаса нахъе коляскабазда рекIун баскетбол хIаялъул рахъалъ Дагъистаналъул тIаса бищараб командаялда хIалев чи. ГIумру гьабун вуго ЦIияб ЧIикIаб росулъ. 2015 соналъ хъизанги гьабуна. Росу рагIалда бана мина-рукъги.
Бокьун буго баркала загьир гьабизе гьеб баялъулъ гIахьаллъи гьабун дие кумек гьабурал волонтеразе ва гьезул бетIерлъиялда вугев росдал имам Шамил ГIисахIажиевасе. Росулъ кинаб хIажалъи кканиги кидаго хIадурго рукIуна гьел кумек гьабизе. ИчIабилеб волонтеразул къукъаялъ, «Инсан» фондалъул квербакъиялдалъун, дир рокъобе бачана ток, лъуна стабилизатор, рокъоб гьарулел цогидалги хIалтIабазе квербакъана.
Гьединго баркала буго Гъизилюрт районалъул ЭГСалъул начальник МухIаммадов МухIаммадие. Гьесул кумекалдалъун дир рукъалде цебе щвезегIан бачана газ. Гьелдаго цадахъ гьаруна цогидал хIалтIабиги.
Гьарула гьезие талихI рохел. ГIадамазе кумек гьабулеб гIадин, ТIадегIанас гьезиеги гьабеги киналниги ишазулъ.
