Жагъаллъи ккезе гурин

Жагъаллъи ккезе гурин

Рукъ бакIа-бахарун, бацIцIун лъугIидал, дагьаб мехалда жаниб цIидасан хIур чIван батула. Гьединаб ишкал нужерги букIунеб батани, гьале цо-кIиго малъа-хъваял:

1. ХIур цIикIкIун заманаялъ рокъоб бугеб къайиялда тIад чIечIого букIине бокьани, чурадилаго тIолеб кондиционер жубазе бегьула лъеда гъорлъе.
2. Жеги бегьула цIорораб лъел стаканалде гъорлъе 50-75 мл уксусалъул тIезе. Гьенибего жубала 2 гьитIинаб гъуд зайтуналъул нах, ва бокьараб эфирияб нахалъул 2-3 къатIра. Гьеб раствор мебелалде пунхъила. ХIур бегунгутIи гуреб, жеги квешал махIал тIагIинариялъеги кумек гьабила гьеб къагIидаялъ.
3. Бищунго лъикI хIур бацIине квербакъула микрофибраялъул тряпкаялъ. Биччизабун бацIцIаниги, бакъванго бацIцIаниги.
4. 1 литр хинаб лъелъе жубала 10 мл гIадатияб спирталъул. Гьеб лъедалъун биччизабураб ххамидалъун хIур бацIцIина ва тIасан тамахаб салфеткаялъ цIидасан бацIцIина.

РацIцIалъи – иманалъул бащалъи буго. ХIур сабаблъун сахлъиялъе жагъаллъи ккезе рес буго, аллергия байбихьизе бегьула. РацIцIалъи цIуниялдалъун Аварагас ﷺ гьабураб амруялда нахъ рилълъун, ва хъизан-лъималазул сахлъи цIуниялъеян абун, рукъзал рацIцIунаго ният гьабуни, гIорхъи гьечIеб кири щвела, ин шаа Ллагь.

Хадижат Хизриева