ГIорхъолъа араб...
Абу Гьурайратидасан бицараб хIадисалда буго: «Къиямасеб къоялъул гIаламатаздасан ккола гIорхъолъа араб къарумлъи», - ян. (ТIабарани)
Гьединго, Абу Гьурайратидасан бицана аварагас ﷺ абунин: «Заман къокълъизе буго, гIамалал дагьлъила, къарумлъи гьарзалъила», - ян. (Бухари)
МугIавиятидасан бицана аварагас ﷺ абунин: «ГIамал гьабизе захIмалъизе буго, къарумлъиги гIадамазулъ цIикIкIине буго», - ян. («Ал-МажмугIул Кабир», ТIабарани)
Къарумлъи какун ва гьеб тарасе бугеб рохел бицун ТIадегIанав Аллагьас ﷻ Къуръаналда абуна (магIна): «Нужеда хIалкIвараб хIалалда нуж Аллагьасе мутIигIлъе, Гьесухъ гIенекке ва Гьесул гIазабалдаса хIинкъа! Ахираталъе батизелъун нужерго боцIи-мал напакъаде кье! Жидерго напсалъул бахиллъиялдаса жал цIунарал, гьелъул хъантIи ва сурукълъи жидеца къезабурал гIадамал руго бахьи буголъиялда кверщел батарал», - ян. (Сура «Ат-Тагъабун», аят 16)
Жабиридасан бицана аварагас ﷺ абунин: «Зулму гьабиялдаса нуж хIинкъа, зулму къиямасеб къоялъул бецIлъи буго. ГIорхъолъа араб къарумлъиялдасаги хIинкъа. Нужеда цере рукIарал къавмал къарумлъиялъ, хIалалаб гурелде къасд гьабун, цоцазул би тIун, гьалаг гьаруна», - ян. (Муслим)
Квешал тIабигIатал, гьайгьай, гIемерал руго. Гьездаса къарумлъи щай рикIкIараб къиямасеб къоялъул гIаламатаздасан? Къарумав чиясул Аллагьасда иман лъей загIипаб букIиналъ. Гьесда ракIалда ккола садакъа гьабиялдалъун боцIи дагьлъулин абун, ризкъи кьолев Аллагь ﷻ вукIингун цадахъ. ХIадисазда буго садакъа кьеялдалъун инсанасул боцIи дагьлъуларин абун. Амма къарумав чиясда гьелъул гIаксалда ракIалде ккола.
Къарумлъиялъул гIорхъолъа араб гIаламат ккола инсан жиндаго тIадцин гIарац хвезабизе къарумлъи. Чанги бечедав чи вукIуна, банказда миллионалги лъун, мискин-пакъираз гIадин гIумру гьабулел.
Абубакаридасан бицана аварагас ﷺ абунин: «Гьал хадур рехсарал тайпаби алжаналъуре лъугьунаро: рагIи кколарев, жинда мугъчIвай гьабизе бегьуларев ва къарумав чи», - ян. (Тирмизи)
