Кинав вукIарав Авараг ﷺ?
Кинав вукIарав Авараг ﷺ?
Гьале тIаде щолеб буго Авараг ﷺ гьавурав хирияб моцI – рабигIул аввал. Гьеб моцI бусурбабазе хирияб буго. Гьеб моцIалъ нилъеца мавлидал рачун, Аварагасул ﷺ бицун тIобитIизе жигар бахъула. Гьанибги рехсела цо-цо Аварагасул ахлакъал гьесул хьвада-чIвади, кинабго гьаниб рехсезе ресги рекъеларо ва къаламги гIеларо.
ТIадегIанаб тIабигIат
ТIадегIанав Аллагьас ﷻ Жиндирго Авараг ﷺ гIемерал тIокIлъабаздалъун хасгьабуна рикIкIун хIалкIоларел. Аллагьас ﷻ Авараг тIабигIатаздалъун гIемер веццана цогидал тIокIлъабазде дандеккун. ТIадегIанав Аллагьас ﷻ Къуръаналда абуна (магIна): «ХIакълъунго мун, Авараг ﷺ, тIадегIанав тIабигIаталъул вуго», - ян. (Сура «ал-Къалам», аят 4).
ХIеренлъи
Авараг ﷺ гIадамазе бигьаяв, хIеренавлъун вукIана, кутакалда лъикI гьездехун гурхIел-рахIмуги гьабулаан. Къуръаналда Аллагьас ﷻ абуна (магIна): «Нужедаго гъорлъа Авараг ﷺ вачIун вуго нужехъе, нужее къварилъи ккей жиндие захIмалъулев, нуж иман лъун битIараб нухде ккезеги цIакъ бокьулев, миъминзабазда гурхIел-рахIмуги бугев». (Сура «ат-Тавбат», аят 128). Ай, нижехъе вачIана Авараг ﷺ, инсанлъиялъулъ жив нужеда релълъарав. Нижеца гьев цогидаздаса хасгьавун вукIиналъе гIоло, нужеда гурхIел гьабиялъул ретIел ретIана гьесда ва гьевги нужеда тIад тана гурхIел-рахIму бугев вукIиналъул хIужабаздалъун. ТIадегIанав Аллагьас ﷻ гьесие кьуна жиндирго берцинал цIарал – Рауфун ва РахIимун, гьелъул магIна ккола «ГурхIулев» абун. Жиндир лъикIлъиялъулъ Аварагас ﷺ киданиги бусурбабазда ва капуразда гьоркьоб батIалъи гьабичIо.
Агьлуялда гурхIел
Аварагасул гурхIел агьлуялъеги гьабулаан. Анасица абуна: «Дида вихьичIо щивниги АвараггIадин хъизаналде лъикI вукIуневлъун», - абун. Гьединго Аварагас гьезие рукъалъул хIалтIабазулъ кумекги гьабулаан.
Сахавалъи
Сахавалъи Аварагасул тIабигIатаздасан букIана. Аварагасул ﷺ сахавалъи букIинчIо гIадамал тIадецIаялъе, чIужуялъе, бечелъи тIаса инилан хIинкъун. ГIицIго Аллагьасе ﷻ гIололъун, ислам тIибитIизелъун ва ятимазе кумекалъе букIана.
КъотIи тIубазаби
Аварагас ﷺ кидаго къотIи тIубазабулаан ва жиндихъе цIунизе кьурабги цIунун, зарал ккезе течIого нахъе буссинабулаан. Гьединав гьев вукIиналъ гьесие цIар щвана «Аминун» абураб.
ТIаса лъугьин
ГIадамазул бищун хIалимав Авараг ﷺ вукIана, тIас лъугьине бищун бокьулев вукIана. Росу тIарада ругел унтарал чагIазухъеги зиярат гьабизе унаан.
Бищун хирияв
Киналниги Аварагзабазда гьоркьов бищун хирияв МухIаммад Авараг ﷺ ккола. КьучIаб рагIиялда бан 124000 азарго Авараг вуго ва гьезда гьоркьоб 314 мурсалунал руго. Аллагьас ﷻ Къуръаналда рехсана 25 Авараг. Нилъер Аварагасда ﷺ хадуб хирияв ккола Ибрагьим Авараг, хадув Муса, хадув ГIиса, хадув НухI, хадув Адам.
