ГIолохъабазул мажлис-ифтIар
ГIолохъабазул мажлис-ифтIар
Гьал къоязда МахIачхъалаялда бугеб Гумбет районалъул гIолилазул централда тIобитIана Килалъ росдал гIолохъабазул мажлис-ифтIар. Гьелда гIахьаллъи гьабуна росдал имам ГIабдуллагь СултIановас, ИсламДаг сайталъул редактор НурмухIаммад ГIизудиновас, росдал гIолохъабазул цевехъан Мавлидин ГIузайровас ва магIарул мацIалда бахъулеб «Ас-салам» казияталъул редактор ГIабдуллагь МухIаммадовас.
Жиндирго кIалъаялда НурмухIаммад ГIизудиновас бицана гIолохъаби гъорлъе цIазе рес бугел диниялгун политикиял, экстремистиял къокъабазул хIакъалъулъ. Хасго бакътIерхьул улкабазда ругел жасусазул хIиллабазул.
ТIадчIей гьабуна гIолохъаби гуккулел, бусурбабазде куфру гIунтIизабулел, мекъаб нух ккураб къокъаялдаса цIунизе ккеялдаги.
«Ас-салам» казияталъул редактор ГIабдуллагь МухIаммадовас баян гьабуна исламалъул тарихалда гIолохъабазул букIараб кIвар. «Исламалъе цебетIей щвана гIицIго гIолохъабаздалъун. ГIолохъаби лъикI ругони, жамгIиятги лъикI букIуна, амма гьезул гIадлу хвани, жамагIатги биххула, баракатги уна.
ГIолохъанго рукIаго жигар бахъизе ккола гIибадаталъеги. Херлъидал гьабураб тIагIатги хераб букIуна. ГIолохъаби рукIине ккола нилъер рухIиял, диниял церехъабазда, тIарикъаталъул устарзабазул нухда нахърилълъараллъун. Гьелда жаниб буго нилъер талихI», - ян лъугIизабуна гьес жиндирго кIалъай.
«Ас-салам» казияталъул редакциялъул рахъалдаса ГIабдуллагь МухIаммадовас сайгъат гьабуна имам Шамилил суратал гIолохъабазул активистазе. Гьединго сайгъат кьуна Килалъ росулъа машгьурав фотоблогер Шамсудин Жамалудиновасеги. Гьесул кIудияб жигар букIуна росдал данделъаби рахъиялъе, гьезул архив гьабиялъе.
КIалъазе рахъарал цогидазги лъикIал малъа-хъваял ва насихIатал гьаруна гIолохъабазе.
Мажлисалъе квербакъи гьабуразе ахираталда Аллагьас лъикIаб жаза гьабеги.
Расул МухIаммадов
