Калам къокъал, магIна гъваридал аварагасул ﷺ рагIаби
Бичасул аварагас ﷺ абуна:
– Алжаналъул кIул «Ла илагьа иллаллагь» буго.
– Диналъул низам – варагI буго.
– Гуккиги макруги жужахIалъуб буго.
– Жиндир гьабулеб гIамал нахъе бахъарасе ахираталда насабалъ пайда гьабуларо.
– Аллагьасукьа жив хIинкъарав чиясул мацIги свакала (зикруялдалъун) ва ццим буссинги тIалаб гьабуларо.
– Аллагьасукьа хIинкъарав чи цIунула кинабниги жоялдаса.
– Аллагьасда аскIоб жиндирго бугеб даража лъазе бокьарав чи валагье жинда аскIоб кинаб даража Аллагьасе бугебали.
– Дунял бокьарав чиясул ахираталъе зарал ккола.
– Ахират бокьарасул дунялалъе ккола зарал. Гьединлъидал нужеца тIаса бище нахъе хутIулеб паналъун унелдасан.
– Цо кинаб бугониги жо бокьарав чиясул гьеб рехсей цIикIкIуна.
– Кинаб къавм гьесие бокьаниги, къиямасеб къоялъ гьезда цадахъ вахъуна.
– Аллагьгун дандчIвазе бокьарав чигун БетIергьанасеги бокьула дандчIвазе.
– Гьаб диналда жаниб гьечIеб жо ургъани, гьеб нахъчIвараб буго.
– Аллагьасул ццим бахъинабиялдалъун гIадамал рази гьарурав чи гьездего тIамун тола Халикъас.
– Аллагьасе мутIигIлъарав чиясул кверщел батула.
– Залимасе кумек гьабурасде тIаде гьевго тIамула Аллагьас.
– Жиндир къварилъи къватIиб гьурщарав чи сабру гьабурав кколаро.
– Щиб бугониги жоялда баракат лъуни, гьелда тIадчIей гьабе.
– Сундулъго гIедегIуларев чи витIун ккола яги гьелде гIагарде щола.
– Сундулъго гIедегIулев чи мекъи ккола яги гьелде гIагарлъула.
– Цониги къавмалда релълъенлъи гьабурав гьездасан ккола.
– Сунда бугониги жиндир иш базабурав ва хурхинабурав чи гьелде тIамун тола.
– Инсанасул ислам лъикIлъиялдасан ккола хIажат гьечIеб калам рехун тей.
