Сахлъиги рукIа-рахъинги
Сахлъиги рукIа-рахъинги
Инсанасул сахлъи лъикIаб букIине ккани, рукIа-рахъиналда бараб жо гIемер букIуна. Сахлъиялде кинаб кIвар инсанас кьолеб батаниги, гьелда бараб букIуна гьесул чорхол загIиплъи-щулалъиялъул рахъ.
РацIцIалъи цIунулеб рокъоб сахлъиги лъикIаб букIуна, чорокал, хъубал чагIазул рокъоб сахлъиялъул рахъги лъикI букIунаро – гьеб хIакъикъат лъидаго лъалеб батила. Инсанасул рукIа-рахъиналде гъорлъе щибха унеб ва сунда бараб букIунеб чорхол сахлъи? ТIоцебесеб иргаялда, гьеб ккола чиясул квен. Хадуб - рукIа-рахъиналъул шартIал. Кинаб ресалъул, кинаб рацIцIалъиялъул чи гьев кколев ва хIалхьи гьабулеб къагIида кинаб бугеб.
Гьелде тIадеги, цIикIкIараб кIвар буго, тохтурзабазул къагIидаялъ абуни, гигиена цIунизе лъалеб бугищ-гьечIищин абураб. Гьал киналго жал хIисабалдеги росун гIаммаб къагIидаялъ лъугьуна чиясул сахлъиги, гIумруялъул соналги. Жиндирго рукIа-рахъиналъулъ гьал тIадехун рехсарал жал цIунизе лъалел ругищ, сундулъго адабал гьаризе лъалищ? Лъалел ратани, сахлъиги букIуна. РацIцIалъи гьабулеб гьечIищ – букIунаро сахлъиги.
Сахлъи инсанасе кутакалда хIажалъула гIибадат берцинго ва битIун гьабизе. Щокъаб лага-сан бугесул гIибадатги берцинаб лъугьунаро. Гьелъие гIоло буго нилъеца сахлъиги балагьулеб. РацIцIалъи цIуниги исламалъул тIалаб буго. РацIцIалъи цIуни шартIлъун гьабун буго какиеги. Амма гIибадат битIун ккечIони, нилъер талихIги букIунаро. Гьаб дунялалда гIумру гьабиялъул мурадго БетIергьанасе лагълъи гьаби гурищ кколеб? Гьебги лъугьунеб гьечIони, дунялалда рукIиналъул магIнаго щиб кколеб? ГIибадат буго чорхол жанисеб рахъалъул рацIцIалъи цIуни, черх чороклъиялдаса цIуни тIасияб рацIцIалъи бугеб кинниги. Чорхол тIасиябги жанисебги рацIцIалъи цIунизе лъай кьейги нилъее Аллагьас ﷻ. Инсанги камиллъуларо жанисанги тIасанги вацIцIалъичIони. ГIадада гурелъул Бичасул аварагас ﷺ абун бугеб: «РацIцIалъи цIуни иманалъул бащалъи буго», - ян.
