Как къабул гьабиялде хьул…
Как къабул гьабиялде хьул…
ХIурматиял бусурбаби, къол щуябго как тIадаб букIин лъаларев чи нилъеда гьоркьов ватиларо. Гьелъухъги кIудияб шукру-рецц буго БетIергьанасе. Какилъ цIунизе кколел шурутIалгун арканал камил гьарун хадуб щивав чиясда лъазе ккола щивас жинцаго гуреб гьеб как жамагIат гьабун бай Бичасул аварагас тIадчIей гьабураб суннатлъун букIин. ХIатта гьелда абула фарзул кифаятин абун.
Гьелъул магIна ккола росу бугеб бакIалда яги шагьаралда цонигияз гьеб жамагIат бачIони, тIубараб гьеб бакIалъул агьлуго мунагьалде кколин аби. Хирияб хIадисалда буго: «Росулъ яги гIалахалда данделъарал лъабгоял, жидеца жамагIат гьабун как баларел рукIунаро, гьезда шайтIаналъ кверщел гьабун гурони. Дуца жамагIаталда тIадчIей гьабе, бацIица нахъа хутIараб чахъуйин кунеб», - ян.
Жеги, жамагIат мажгиталде ракIарун бай лъикIаблъун бихьизабун буго бихьиназе. Гьелда жанибги гIемераб пайда буго. Гьезул цояб ккола къойида жаниб щуго нухалда бусурбаби цоцазда рихьи, цоцазул ахIвал-хIал лъай ва цоцазе кумек гьабизе рес букIин.
ЖамагIат гьабун балеб какил хиралъи бицараб бакIалда Бичасул аварагас абулеб буго: «ЖамагIат гьабун бараб какил кири къоло анкьго нухалда цIикIкIараб буго жинцаго батIаго баралдаса», - ян. Къоло анкьгоялъул бакIалда цо босулев чи яги унтрав, гIакълу дагьав вукIине ялъуни иман цIакъго загIипав ватизе ккола. Цогидаб хIадисалда буго: «Цо чияс цогидавгун цадахъ бараб как хирияб буго жинцаго баралдаса. КIиго чигун бараб, цоявгун баралдаса хирияб буго. КигIан чи цIикIкIаниги гьеб Аллагьасе бокьулеб буго», - ян.
ЖамагIаталда бараб как къабул гьабиялъе хьул цIикIкIараб букIин бичIчIулев салафазул цояз гьадин бицун буго: «ЖамагIат гьабизе гIадамал тIаде рахъиндал Аллагь балагьула имамасул ракIалде, гьесул рекIелъ лъикIлъи, ай хIузур батани, БетIергьан гьелда разилъула ва киназулго какги къабул гьабула, мунагьалги чурула. Амма гьесул рекIелъ щибго лъикIлъи-хIузур батичIони, цогидал муъминзабазул рекIеде балагьула, ай жамагIаталда ругезул. Гьезул цонигиязул рекIелъ лъикIлъи, ай хIузур батани, БетIергьан гьелда разилъула ва киназулго какги къабул гьабула, мунагьалги чурула. Гьезда гьоркьов вугесул цонигиясул рекIелъ щибго хайир батичIони, гьел как баялъе данделъиялде, как базе тIаде рахъиналде, Аллагьасда цере чIеялде балагьун, БетIергьан гьездаса разилъула ва киназулго какги къабул гьабула, мунагьалги чурула», - ян.
