FileserverdАССАЛАМ ВЕРСТКА (ничего не удалять!)На сайтПапка As_salam_avar-20-2025LinksНовая папка
Нилъ киналго руго дугIаялде хIажатал гIадамал. Гьединлъидал цоцаздаса ратIалъулелъул, гьединго рикIкIада ругезулгун къо-мех лъикI гьабулелъул, цоцазде васият, аманат гьабула дугIа гьабеян абун. КигIанго къватIибе загьир гьабичIониги рекIел тIинда, цо гьитIинабго бакIалда букIунги нилъерги батула гьабгощинаб гьарулебги бугин, дугIа къабуллъулебго гьечIин абураб жо.
Басраялъул базар къотIун унев Ибрагьим бин Адгьамида сверухъ ракIаранила гIадамал. Ва, Аба-ИсхIакъ, нижеца гьарулеб буго, амма дугIаялъе жавабго гьабулеб гьечIин хитIаб гьабунила гьесде гIадамаз. Цинги гьес жаваб гьабунила, щайгурелъул, нужер ракIал анцIго жоялдалъун хун ругин абун.
ТIоцебесеб, нужеда Аллагь лъана, кинниги Гьесие кколеб хIакъ кьолеб гьечIо.
КIиабилеб, нужеца чIезабулеб буго Бичасул авараг ﷺ вокьулин абун, амма гьесул суннат толеб буго.
Лъабабилеб, нужеца Къуръан цIалулеб буго, амма гьелда гIамал гьабулеб гьечIо.
Ункъабилеб, Аллагьасул нигIматал кунел руго, амма гьелъухъ шукру гьабулеб гьечIо.
Щуабилеб, нужеца абулеб буго тушман шайтIан бугин, амма гьебгун рекъон рукIунел руго.
Анлъабилеб, нужеца абулеб буго Алжан букIин хIакъаб бугин, амма гьеб щвезе хIаракат бахъулеб гьечIо.
Анкьабилеб, жужахI букIин мухIканаб бугин руго нуж, амма гьелдаса цIуни гьабулеб гьечIо.
Микьабилеб, хвел хIакъаб бугин руго нуж, амма гьелъие хIадурлъиго гьабулеб гьечIо.
ИчIабилеб, макьидаса рорчIидал, нужерго гIайибалги рукIаго, цогидазул гIунгутIаби рехсолел руго.
АнцIабилеб, нужерго хварал рукъулел руго, амма щибго пикру-вагIза гьелдаса босулеб гьечIо.
Балагьеха, бусурбаби, доб цебе заманалдацин гьалгощинал гIайибал рукIарал, нилъер заманалда кигIан цIикIкIундай гьел ругел?
ГIалимазабазул цо бутIаялда цIехолеб буго, нижер дугIаялъе жаваб щайдай бачIунареб абун. Цинги гьез жаваб гьабулеб буго, щайгурелъулин, Аллагьас нужее нигIматал кьун ругин, шукру нужеца гьабулеб гьечIин. Нуж Аллагьасде гIасилъидал тавбу-истигъфар гьабулеб гьечIин. ГIелму нужеда рагIидал, гьеб хIалтIизабулеб гьечIин. Загьидазабигун цадахъ рукIунин, амма гьезул гIадаб гIамал гьабуларин. ЗулмучагIазул яшав бихьулеб бугин, амма щибго пикру гьабулеб гьечIин.
Аллагьас дугIа къабулаллъун гьареги.
