ШайтIан рикIкIалъизабе
ШайтIан рикIкIалъизабе
Кьижизе регулелъул гьаризе лъикIал, ай Аварагасдасан ﷺ рачIарал пишаби гIемерал руго. ГIаишатидасан бицана гьезул цояб «Аятул Курси» цIали кколин абун. Кьижилалде цебе гьеб цIаларав чиясдаса шайтIан рикIкIалъулин хъван буго тIахьазда.
Абу Гьурайратидасан бицана: «Цо нухалъ хирияв Аварагас ﷺ дида тIадкъана рамазан моцIалъ бакIарараб закагIаталъул тIалаб гьабиялъул иш. Цо къоялъ пуланав чи дихъе вачIана ва жиндиего квен бакIаризе лъугьана. Дица гьесда абуна: «АллагьасхIаги дица мун Аварагасухъе ﷺ вачине вуго!» - ян. Гьес абуна: «Дир кутакаб хIажалъи буго гьелде. Дир буго кIудияб хъизан. Бегьулеб батани, виччай дун», - илан. Дица гьев виччана ва радал Аварагас ﷺ дида гьикъана: «Я, Абу Гьурайрат! Дур асирас щиб сон гьабураб?» - илан. Дица абуна: «Я, Бичасул Расул ﷺ, кутакаб хIажалъи ккун бугин абуна гьес ва кIудияб хъизан букIиналъулги бицана. Гьесда ракIгурхIун виччана дица гьев», - илан. Аварагас ﷺ абуна: «Гьес дуе гьереси бицана. Гьев духъе жеги вачIине вуго», - ян.
Аварагас ﷺ гьедин абидал, дун гьев чи вачIиналъухъ балагьун чIана. КватIичIого гьев вачIана ва квен бищизе жувана. Дица гьев ккуна ва Аварагасухъе ﷺ вачине вугин абидал, гьес абуна: «Виччанте дун, дир руго гIемерал лъимал ва тIокIав гьаниве вачIинаро», - ян. ЦIидасан, ракIги гурхIун, виччан тана дица гьев. Радал Аварагас ﷺ гьикъана: «Я, Абу Гьурайрат! Дур асирас щиб сон гьабураб?» - илан. Дица бицана гьес абураб ва ракIгурхIун виччан танин кIалъана. Аварагас ﷺ абуна: «Гьес дуе гьереси бицана. Гьев духъе жеги вачIине вуго», - ян.
Лъабабизеги вачIиндал, дица гьесда абуна Аварагасухъе вачине вугин абун. Цинги гьес абуна: «Виччай дун. Дица дуда малъила Аллагьас ﷻ дуе пайда гьабулеб калима», - илан. Ва абуна кьижизе вегулелъул «Аятул Курси» цIалейин байбихьудаса ахиралде щвезегIан. Дица гьев виччана ва Аварагас ﷺ радал цIидасан гьикъана сон дур асирас щиб гьабурабилан абун. Дица абуна: «Я, Бичасул Расул ﷺ, гьес абуна цо калима малъилин абун ва малъана кьижилалде цебе авалалдаса байбихьун ахиралде щвезегIан «Аятул Курси» цIалеян. Цинги Аварагас ﷺ абуна: «Унго-унгояв гьерсихъан вугониги гьес дуда битIараб бицун буго! Лъалищ дуда гьеб лъабабго сордоялъ щибгун кIалъалев мун вукIаравали? Гьеб букIана шайтIан», - ян. (Бухари)
