БухIилаго кванаге, квандеги пударуге
БухIилаго кванаге, квандеги пударуге
Кванил адабаздасан ккола кванде пударунгутIи. Пудари карагьатаб иш буго. Ибну ГIаббасица абулаан: «Аллагьасул ﷻ Расулас ﷺ я кванде яги лъеде тIаде киданиги пулароан ва цIарагIалъубе хIухьелги биччалароан», - ян. (Ибну Мажагь)
Цогидаб хIадисалда буго: «Лъим гьекъолаго цIарагIалъубе хIухьел биччаге. Цоги нухалъ гьекъезе бокьидал, хIухьелги босун байбихье цIидасан гьекъезе», - ян. (ХIаким)
«Файзул Къадир» абураб тIехьалда хъван буго: «Лъеде хIухьел биччан гьекъей хIайваназул гIадат буго. Инсанас гьедин гьекъедал, гьес хIайваназда релълъенлъи гьабула», - ян.
Аварагасда ﷺ цIехана кванилъ гIучI-мичIил батани, щиб гьабилебилан абун. Аварагас ﷺ абуна: «ЛъикIаб букIина гьеб нахъе босани яги нахъе тIуни», - ян.
Аварагасул ﷺ суннаталдасан ккола цIакъго бухIараб квен дагьаб цIорозегIанги тун кванай. Гьес ﷺ абулаан бухIараб квен баракат гьечIеб букIунин. Абубакарил яс Асмаицаги чурпа гьабун кваназе ахIилалде, суркIаялъубеги тIун, тIаса хIухьел инегIан толаан. Гьединаб кванде Аварагас ﷺ абуна: «Гьелъулъ буго кIудияб баракат», - илан. (Ибну ХIиббан)
Жакъа тохтурзабазги чIезабун буго бухIараб квеналъ инсанасе зарал гьабулеблъи.
Кванде пудари рекъечIеб гIамал буго. Гьединлъидал дагьаб мехалъ, бухIи инегIан, тезе ккола квен.
Медицинаялъул рахъ босани, кванде пуй ва гьедин кванай цIакъ заралияблъун рикIкIуна. Нилъер хIухьел, кванидаса бахъун бачIунеб бухIараб хIухьелгун данделъидал, гьеб сверула заралиял бактериязде. Кванда цадахъ гьел бактериял угьире индал, гьеб сабаблъун чохьол унтаби рагъаризе рес буго. Гьелдаго цадахъ щекъер унтизеги рес бугин хъвалеб буго.
ГIемер халлъула гIисинал лъималазе квен кьолаго эбелалъ цин жинцаго кванде пун ялъуни хIацIуца биччизабун цIорозабулеб, ай лъимадуе кьелалде. Гьеб буго мекъаб пиша. Эбелалъул унтаби лъимадуе щвезе бищун хехаб нухги гьеб буго.
Аллагьас ﷻ кумек гьабеги!
