ГIагарасдасаги гIагарав
Умумузул аби буго рикIкIад вугев гIагарав чиясдасаги аскIов вугев мадугьал лъикIавилан абураб. Щайин абуни, гьесул кумек цIикIкIун щолеб букIун рикIкIада вугев гIагарав чиясдасаги.
Аварагас ﷺ абун буго, Жибрил малаикас гIемер мадугьаласул хIакъ цIуниялъул бициналъ, жинда кколеб букIанин гьев ирсилавлъунцин гьавилин абун. ГьедигIанги кIвар кьола исламалъ мадугьаласул хIакъ цIуниялде.
Мадугьалзабиги руго лъабго батIиял: нилъеда тIад цо хIакъ бугев, бусурбанав гурев; нилъеда тIад кIиго хIакъ бугев бусурбанав; нилъеда тIад лъабго хIакъ бугев бусурбанав гIагарав мадугьал.
Аварагасул ﷺ хIадисалда буго: «Аллагьасдаги Къиямасеб къоялдаги божулев чияс мадугьал кIодо гьаве», - ян.
Гьединлъидал дуца мадугьаласе кинаб бугониги квешлъи гьабизе бегьуларо. Квешлъи гьабичIого тарабги гIоларо, гьес гьабураб квешлъи баччизеги ккола, гьес гьабураб квешлъи баччарабги гIоларо, гьесие лъикIлъи гьабулевлъунги вукIине ккола.
Ибну МукъфагIида рагIун буго мадугьалзабазул лъимал гIодулел. Гьел гIодулел рукIун руго, налъи бецIизе кIоларого, рукъ бичизе кколеб букIиналъ. Гьес, мадугьаласул налъи бецIун буго ва минаги бичизе ккун гьечIо.
Рокъор гIункIкIал гIемерлъаниги цояс рокъобе кету бачун гьечIо, гьелдаса хIинкъун гIункIкIал мадугьаласухъе тIурилин абун. Къокъго абуни, мадугьаласе саламги кьела, гьикъа-бакъиги гьабила, унтун вугони ваккизе ина, рохел-пашманлъи щвараб мехалъ аскIов чIела, гьесул цевесев чи хвани, тагIзияталде ун цадахъ чIела, жиндирго гордахъан яги азбаралъусан мадугьаласул азбаралде валагьиларо, гьесул руччабазухъ, ясазухъ балагьиларо, гIазу-цIад гIадал жалаздалъун гьесул рукъалъе зарал кколеб щибго жоги гьабиларо, гьесул гIайибал рахчила, лъималазе берцинаб мацI бицина.
Къокъго абуни, бусурбабазда аскIор цIунизе кколелщинал адабал кIиго нухалъ цIикIкIун, ракIбацIцIадго тIуразе ккола мадугьаласда аскIоб.
