ГIей гьечIо
ГIей гьечIо
НигIматазухъ БетIергьанасе ﷻ щукру гьаби буго кигIан гьабуниги, бицаниги, малъаниги рагIалде бахъунареб, бахъунги лъугIи гьечIеб жо. Щайин абуни, нигIмат кьей гьечIелъул дагьлъулеб. Аллагьас ﷻ нигIмат тIаде чвахизаби къотIизе толеб гьечIебго гIадин, гьелъухъ щукру гьаби нилъецаги къотIизе тезе бегьуларо.
Къуръаналда буго (магIна): «Нужеца щукру гьабуни, Дица цIикIкIинабила», - абун (сурату «Ибрагьим» 7 аят). Хирияб аяталда Аллагьас ﷻ малъулеб буго щукру гьабулеллъун рукIине, цинги гьеб гьабурабгIан Жинца цIикIкIинабизе бугин бичIчIизеги гьабулеб буго.
Щукру гьабиялъеги буго хасаб тасбихI-дугIа цIали, кьураб нигIматалдаса мискин-пакъирзабазегун хIажаталъубе садакъа кьей, черхалъ сужда гьаби гIадал батIи-батIиял къагIидаби.
МацIалъ абун гьабулеб щукруялъул хIакъалъулъ гIалимзабаз рехсаразул цо-цоял ккола:
– «АлхIамду лиЛлагьи хIамдан ювафи нигIамагьу ва юкафиу мазидагьу» абураб калима. Гьаб буго Адам аварагасул тасбихI.
– «АлхIамду лиЛлагьи бижамигIи махIамидигьи куллигьа ма гIалимту мингьа ва ма лам агIлам гIадада халкъигьи куллигьим ма гIалимту мингьум ва ма лам агIлам».
– «Я Рабби, лакал хIамду кама янбагъи лижалали важгьика ва лигIазими султIаника».
Ибну ГIумаридасан бицун буго, Аварагас ﷺ абунин: «Аллагьасул ﷻ лагъзадерил цояс абуна «Я Рабби, лакал хIамду кама янбагъи лижалали важгьика ва лигIазими султIаника», - абун. Цинги гьел рагIабаз сваказаруна гIамалал хъвалел малаикзаби ва гьезда лъачIо кин гьеб хъвалебали. Хадуб гьел кIиялго малаикзабаз БетIергьанасда ﷻ абуна: «Я нижер Аллагь! Дур лагъзадерил пуланас абуна кин ажру хъвалебали нижеда лъаларел рагIаби», - ян. (Лагъас абураб жо лъалевлъун Жив вугониги) ТIадегIанав Аллагьас ﷻ гьикъана: «Щиб дир лагъас абураб?» - абун. Гьез жаваб гьабуна: «Я Рабби, лакал хIамду кама янбагъи лижалали важгьика ва лигIазими султIаника», - ян абурал рагIаби абунин. Цинги ТIадегIанав Аллагьас ﷻ гьезда абула: «Нужеца гьел рагIаби Дир лагъас абухъе, Дунгун гьев дандчIвазегIан хъвай, Дица гьабила гьесие гьезухъ ажру», - ян (ибну Мажагь).
Гьединаб кири цIикIкIараб гIамал буго нигIматазухъ щукру гьаби.
Аллагьас ﷻ тавпикъ кьеги щукру гьабизе.
