Дудего буссуна
Дудего буссуна
Нилъедехун Аллагьасул ﷻ бугеб рахIму-цIоб гIурхъи гьечIеб буго. Гьелъие Къуръан-хIадисалда гIемерал баяналги рехсон руго. Щивав чияс гьарулел гIадатиял ишалгицин руго Аллагьас ﷻ кири кьолеллъун. Диналъул вацасдехун вуссун гьабураб гьимигицин садакъа бугин абураб хIадисги нилъеда лъала.
ГIубадат ибну Самитидаса бицараб хIадисалда буго: «Бусурбабазул мунагьал чуреян гьарарасе Аллагьас ﷻ хъвазе буго гьезул щивав чи рикIкIун лъикIлъи», - ян (ТIабарани).
Гьеб хIадисалъе баян гьабулаго, «Файзул къадир» абураб тIехьалда хъвалеб буго: «Мунагьал чуреян гьаризе бегьула бокьараб къагIидаялда ва рагIабаздалъун», - ян. Гьелдаса босун, бокьараб хIалалда вукIаго муъминчияс абуни: «Я Аллагь ﷻ! Дунялалда ругел бусурбабазул мунагьал чуре», - абун, рес буго БетIергьанас ﷻ гьебсагIаталда ракьалда ругел бусурбабазул гIадад рикIкIун лъикIлъи хъвазе.
Гьединго, гьеб гьари гьабиялдалъун муъминчи ккезехъин вуго жиндир диналъул вацал-яцазе балъго дугIа гьабуравлъун. Гьебги Аллагьасда ﷻ аскIоб кIудияб иш ккола. Гьедин гьабураб дугIаги ТIадегIанас ﷻ нахъчIваларо. Гьелъие хIужалъун буго Аллагь ﷻ разилъаяй Умму Дардаидаса бицараб хIадис: «Бусурбанчияс диналъул вацасе, гьев гьечIеб бакIалда гьабураб дугIа, жаваб щолеблъун буго. Щайин абуни, гьесул бетIералда аскIов вуго вакил гьавун тарав малаик. Гьес диналъул вацасе лъикIалдалъун дугIа гьабунщинахъе, малаикас абула: «Амин, дуеги буго гьесие гьараралда релълъараб», - ян (Муслим).
Цоги, Аварагас ﷺ абунин ГIабдуллагь ибну ГIумаридасан бицун буго: «Жаваб щвеялъул рахъалъ бищун хехаб, аскIов гьечIев чиясе гьабураб дугIа буго», - ян (Бухари).
Диналъул вацал-яцазе дугIа гьабиялде нилъ Аллагьасги ﷻ гьесизарулел руго. Къуръаналда буго (магIна): «Дуца дурго мунагьал чури тIалаб гьабе (МухIаммад ﷺ), гьединго (мунагьал чури тIалаб гьабе) муъминзабазулги муъминатазулги», - ян. Аварагасде ﷺ хитIаб гьабурал ругониги, гьал рагIаби руго умматалде ахIи бараллъун. Щайин абуни, Авараг ﷺ вугелъул мунагьалде ккеялдаса вацIцIадавлъун.
Я нижер Аллагь ﷻ! Дунялалда ругелщинал бусурбабазул Дуца мунагьал чуре, гьезул гьабулелъулъ ккараб кIарчанлъи тIаса лъугьун те, рагъ-кьал, балагь тIаса босе, рахIматал цIикIкIинаре. Квешалдаса рикIкIад гьарун, Мун разияб гIамалалъе тавпикъги кье! Амин!
