Сафар моцI
Сафар моцI
Сафар ккола, исламияб календаралда рекъон, кIиабилеб моцI. ГIараб мацIалдаса буссинабидал, «Сафар» абураб рагIул магIна ккола «тIогьиллъи» абураб. Цоги рагIиялда бан, «сафар» абураб рагIи буго «исфар» абураб масдаралдасан бачIараб. Гьелъул магIнаги ккола «чIобоголъи» абураб.
Ислам бачIинегIан гьеб моцI букIунаан гъутIбузул тIанхал тIогьиллъараб хаслихълъиялъул заманалда. Гьеб заманалда гIарабал сапаралъ рахъунел рукIун руго. Гьелдасан бачIараб буго гьеб цIарги. Жеги гьеб моцIалда абула «Сафар Ал-Музаффар», «Сафар Ал-Хайр» абунги. Гьелъул магIнаги ккола «БитIккеялъул моцI» абураб.
Нилъер гьаб заманалдаги камуларо гIадамал сафар моцIалде гIайибал чIвалел, ай ригьнал гьаризе, сапаралъ рахъине лъикIаб гуреб моцIлъун рикIкIуна. Гьеб буго жагьилаб заманалда рукIарал гIарабияздаса бачIараб мекъаб пикру.
Нилъеда бичIчIизе заман щун буго квешал къоял, моцIал ва гIужал рукIунареблъи. Квешлъаби тIаде цIала ва Аллагьасул ﷻ нилъеда ццим бахъуна нилъеца мунагьал гьаридал. Мунагьал гьарулаго араб заман къиямасеб къоялъ нилъее гIазабалде сверула ва гьелъул гIаксалда, лъикIлъаби гьарулаго араб заман рохелалде сверула.
Сафар моцI квешаблъун букIарабани хирияв Аварагас ﷺ гьеб моцIалъ Хадижатилгун ригьин гьабилароан.
Гьеб моцIалъ гIемерал лъугьа-бахъиналги ккана. Масала, ГIали-асхIабас ФатIимат ячана, ГIамр ибн ГIасица, Халид ибн Валидица, ГIусман ибн ТIалхIатица ислам босана. Гьелдаго цадахъ сафар моцIалъ ккана гIемерал гъазаватал. Хирияв Аварагас ﷺ гьеб моцIалъ гьабуна гьижра.
Гьанже щивас кьеха суал: «Лъида хадурги рилълъун ва лъил нухги ккун нилъеца гьединал, ай кьучI гьечIел жал гьарулел?» Хирияв Аварагасул ﷺ ва гьесул асхIабзабазулищ ялъуни ислам бачIиналде рукIарал жагьилзабазулищ?
Аллагьас ﷻ тавпикъ кьеги квешаб нухги тун лъикIалде руссине. Амин!
