РахIат гьабуралъухъги – харж
РахIат гьабуралъухъги – харж
Щай Генри Фордица жиндирго хIалтIухъабазе рахIат гьабиялъухъ гIарац кьолеб букIараб?
Генри Фордил цо заводалда, гIунгутIаби, жагъаллъаби къачIалеб бригадаялъе гIарац кьолеб букIун буго хIалтIухъ гуреб, рахIат гьабулеб заманалъухъ. Гьезул хIухьбахъиялъул рокъоб букIун буго багIараб чирахъ, щиб бугониги жо хвараб, жагъаллъараб мехалъ бакулеб. Гьеб бакун бугебгIанасеб мехалъ, гьезул харж рикIкIунеб счетчик чIолеб букIун буго. Гьединлъидал, хIалтIухъабаз кидаго гIедегIил гьабулеб букIун буго кколеб хIалтIи кIванагIан хехго гьабизе ва цIидасан гьебго гIунгутIиги ккун, чирахъ бакичIого букIине, кIванагIан лъикIги гьабулеб букIун буго.
Инсанасул тIабигIаталъулъ бугеб рахIат бокьи гьес пайдаяб хIалалъ хIалтIизабун буго. Нилъедаги кIола, диналъул яцал, гьедин дагьаб хIиллаги хIалтIизабун, лъималазул цIалуде яги хIалтIи гьабизе гъира базабизе. ГIемерисел улбузул гIарз букIуна, лъимал телефоналда жанир къан рукIунин абун. Гьезде рагъун, гьел рухун хIасилги кколаро. Гьелгун кIалъан, дандбан, цадахъ гьабизе ккола хIалтIи. Лъималазе бокьулеб, гьезул гъира бугеб жоялдалъун балагьизе ккола гьезухъе нух. Гьеб нухдасан нилъеца цадахъ сапар бухьина хадусеб номералда, ин шаа Ллагь.
