Аллагьасде ﷻ мугъчIвай гьабе
Аллагьасде ﷻ мугъчIвай гьабе
ДугIа буго муъминзабазул ярагъ, Аллагьасул ﷻ хIукмуцин жинца хисизабулеб, жиндалъун гьареян муъминзабазда БетIергьанас ﷻ амру гьабураб, кинаб хIалалде кканиги жиб гьоркьоб ккун мурад тIубай жиндилъ бугеб гIамал.
ДугIаялъул хIакъалъулъ Къуръан-хIадисазда гIемер рехсонги буго. Бицен гьабила цо-цо хIалазде ккедал ва пуланал мурадазе гIоло аварагас ﷺ гьарулел рукIарал дугIабазул.
Кинаб бугониги иш тIаде бачIиндал авараг ﷺ вукIана гьелъулъ кинабго иш Аллагьасде ﷻ тIамулевлъун. ХIавлу къуват гьечIолъиялдасаги живго вацIцIад гьавулев. Гьеб ишалъулъ битIараб нух ва гьелда нахъвилъин, гьединго къосеналдаса рикIкIалъи Аллагьасда ﷻ гьарулев. Жив вохизавулеб иш тIаде щвани гьев ﷺ вукIана Аллагьасе ﷻ шукру гьабун сужда гьабулевлъун. Кинаб бугониги ишалъ хIайран гьавидалги абулаан: «Аллагь, Аллагьу раббии, ла шарика лак», - абун.
Рокъоса къватIиве вахъунелъул абулаан: «Бисми Ллагь, ат-туклану гIала Ллагь, ла хIавла ва ла къуввата илла би Ллагь», «Аллагьасул ﷻ цIаралдалъун байбихьула, тавакал гьабиги Аллагьасде ﷻ буго, хIавлу къуватги Аллагьасдалъун ﷻ гурони гьечIо», - ян абун.
Ургъел пашманлъи тIаде бачIараб мехалъ аварагас ﷺ гьабулаан гьаб дугIа: «ХIасбия ар-Рабби минал гIибад, хIасбиял Халикъу минал махлукъин, хIасбия ар-Разикъу минал марзукъина, хIасбия ллази гьува хIасби, хIасбия Ллагьу ва нигIмал вакил, хIасбия Ллагьу ла илагьа илла гьува, гIалайгьи таваккалту ва гьува раббул ГIаршил гIазим». МагIна: «Дие лагъзадеридаса БетIергьанас гIей гьабула, жидее ризкъи кьураздасаги Жинца гьеб кьолес гIей гьабула, гьединав гьес гIей гьабула Гьев дие гIей гьаби бугев, Аллагьас ﷻ дие гIей гьабула тавакал тIамулезулги Жив лъикIав, дие Аллагьас ﷻ гIей гьабула жиндие лагълъи гьабизе кколезулги цохIо жив гурони гьечIев, Гьесде гьабула тавакалги, Гьев вуго кIудияб ГIаршалъул БетIергьанги».
Цо ишалъ ургъаликье ккезавидал, гьес ﷺ бетIер борхулаан зодобе, ва абулаан: «СубхIана Ллагьил гIазим», «Киналниги жиндие рекъоларел сипатаздаса вацIцIадав вуго ТIадегIанав Аллагь ﷻ», - абун.
ДугIаялъулъ цIакъ бахъи гьабулеб мехалъги абулаан: «Я ХIаю я Къаюм», «Я ЧIагояв, я Абадияв», - абун. РекIелъе пашманлъи бачIинабураб жо тIаде щведалги абулаан: «Я ХIаю я Къаюм, бирахIматика астагъису», «Я ЧIагояв я Абадияв, Дур рахIматалдалъун дица кумек тIалаб гьабула», - ян. Пашманлъи тIаде бачIиндал гьабулеб букIараб цоги дугIаялдаса буго: «Ла илагьа илла Ллагьул ГIазимул ХIалим, ла илагьа илла Ллагьу раббул ГIаршил гIазим, ла илагьа илла ЛЛагьу раббу с-самавати с-сабгIи (анкьабго зобалъул БетIергьан) ва раббул арзи (ракь) ва раббул ГIаршил карим».
ЗахIматаб иш тIаде бачIун дугIа гьабулелъул аварагасул ﷺ рорхарал кверал бетIералдаса эхеде ун рукIунаан. Щиб бугониги гьарун дугIа гьабулелъул кверазул жанисеб рахъ букIунаан гьурмаде буссун, цIуни гьарулелъул тIасияб рахъ букIунаан. Рорхарал квералги гьурмада рахъичIого гIодоре риччалароан.
Цоги, аварагас ﷺ такрар гьарулел рукIарал дугIабаздасан буго: «Я мукъалибал къулуб, саббит къалби гIала диник», гьединго, Къуръаналдаса аятлъунги жиб кколеб: «Раббана атина фи дунья хIасанатан ва фил ахирати хIасанатан ва къина гIазаба ан-нар» - абурал. МагIна: «Я ракIал Сверизарулев, Дур диналда чIезабе дир ракI», «Я нижер БетIергьан! Дуца нижее дунялалдаги ахираталдаги лъикIлъи кье, жужахIалъул гIазабалдасаги цIуне».
Аварагасде ﷺ хитIаб гьабун Аллагьас ﷻ Къуръаналда абулеб буго гьадинаб магIнаялъул аят: «Дуца сабру гьабе дур БетIергьанасул ﷻ хIукмуялъе, хIакълъунго мун вуго Дида цеве, Дида вихьулев, Дида лъала дуе лъугьунебщинаб, гьеб кинабго буго Дир хIукму, Дие бокьичIони щибго жо лъугьунаро», - ян абураб. Аят аварагасде ﷺ хитIаб гьабураб бугониги, гьаб букIине ккола нилъееги гIумрудул нухда кантIи, сабру ва тавакал лъиде гьабизе кколебали малъулеблъун. Аллагьас ﷻ нилъ гьареги щибаб хIалалъулъ сабру ва Жиндехун мугъчIвай бугел лагъзаллъун.
