ЧIикIасез хIасилал гьаруна
ЧIикIасез хIасилал гьаруна
Гьал къоязда Буйнакск районалъул ЧIикIаб тIобитIана 2023 соналда росулъ гьарурал диниял хIалтIабазул хIасил гьабураб мажлис. Гьелда гIахьаллъи гьабуна росдал жамагIаталъго. Мажлисалде ахIун рукIана Дагъистаналъул муфтияталъул дагIват-отделалъул вакилзаби, «Ас-салам» казиятаталъул редактор ГIабдуллагь МухIаммадов ва районалъул имамзабазул советалъул нухмалъулев ГIабдуллагь-хIажи Ацаев.
Аслияб къагIидаялда хIасил гьабулел рахъал рукIана «Ас-салам» казият, рахIму-цIобалъулаб фонд «Инсан», закагIат, дагIват-отделазул хIалтIаби. Щибаб рахъалъул жавабияс бицана араб соналъ гьабураб хIалтIул ккарал хIасилазул ва масъалабазул.
«Ас-салам» казияталъул хIалтIул хIасил гьабуна ЧIикIаб росулъ казият тIибитIизабиялъул жавабияв МуртазагIалица. Гьес бицана исана подписка гьабуразул къадар цIикIкIанин ва абуна хIаракат бахъулин гьеб жиндир заманалда цIалдолезухъе щвезабизе. МуртазагIалие кумекалъе руго волонтералги. Гьезул бищун кIудияс бан буго 70 сон ва бищун гьитIинас - 12 сон. Гьел киназего кьуна Баркалаялъул кагъталги сайгъаталги.
МагIарул мацIалда бахъулеб «Ас-салам» казияталъул редактор ГIабдуллагь МухIаммадовас бицана «РухIул баян» абураб тIехьалда хъван бугин муъминчиясул шартI бугин жиндирго гIакълуялдасаги пикруялдасаги Бичасул Аварагасул ﷺ ва гьесул ирсилаллъун кколел машаихзабазул гIакълу ва пикру цебе ккезабизе ва гьезда нахърилълъинеян. Гьединлъидалин нилъеца кIудияб кIвар кьолеб бугеб гьаб казият тIибитIизабиялдеги, гьеб щивав чиясухъе щвезабиялдеги.
- Щайгурелъул гьеб буго СагIид-афандияс кьучI лъураб ва АхIмад-афандияс кIвар кьолеб казият. Гьелъул хIасил ккейги буго гьел устарзабаз тIаса бищараб, гьез амру гьабураб иш. Балагье, гьаб заманалда казият тIибитIизабулеб буго тIолабго улкаялдаго. Гьединаб ишалде гIадатияв чиясул гIакълу щвей рес гьечIеб жо буго. Рецц Аллагьасе, битIараб нух малъизе устарзабиги ругел, гьезда нахърилълъине Аллагьас тавпикъги кьун букIиналъухъ. Нилъее хутIулеб жо буго гьабулеб хIалтIуе гIицIго квалквал гьабунгутIи, нигIматазухъ шукру гьаби. ХIалтIуе бищун кIудияб кумек, гьелъие квекIен гьабунгутIи буго», - ян бицана редакторас.
ЧIикIаб росдал имам МухIаммадиегун, «Ас-саламалъул» вакил МуртазагIалие редакторас кьуна жиндир багьа гьабун хIалкIолареб Аллагьасул калам - Къуръанал. Баркалаялъул кагътазе мустахIикълъана росулъ ругел идарабазул, жамгIиял гIуцIабазул нухмалъулелги.
«Ас-саламалъул» подписчиказда гьоркьоб тIамуна можоро ва бергьаразе кьуна къиматал сайгъатал.
Мажлисалда кIалъана Буйнакск шагьаралъулгун районалъул имамзабазул советалъул нухмалъулев ГIабдуллагь-хIажи Ацаев, муфтияталъул дагIват-отделалъул жавабияв хIалтIухъан АхIмад ГIабдурашидов ва росдал имам МухIммад ГьитIинов.
Аллагьас тавпикъ кьеги киназего исламалъул нухда битIун хьвадизе. Амин!
СултIан МухIаммадов
