Кьабиялъул хIасил кколищ?
Кьабиялъул хIасил кколищ?
КIудияв гIурав вас кьабун инсуца тарбия кьезе бегьулищ?
Нилъеца гьабулелъул хIасил букIунищали халгьабизе ккола. Эбел-инсуе лъимадуе лъикIлъи бокьулеблъи хIакъаб буго. Гьединлъидал бичIчIизе ккола эбел-инсуца пайдаяб гуреб жо лъималазе гьабулареблъи.
Эбел-инсуца лъималазе тарбия кьолелъул, гьезул ният букIунаро гьезда зулму гьаби. Амма тарбия кьеялъул хIукму, лъимер гIолаго, хисардула. Лъималги батIи-батIиял рукIуна. Масала, рукIуна ишара гьабун жо бичIчIулел. Гьезие гIемераб хабар бицинеги кколаро. РукIуна гIемераб хабар бицине кколелги. РукIуна дагьаб вагъун, семун абизе кколелги. Амма кьабиялъулъ шаригIаталъ гIурхъи чIезабун буго. Кьабизе бегьуларо черх хъахIиллъулеб хIалалда яги лага бекуледухъ. Щайин абуни, ТIадегIанав Аллагьас ﷻ нилъее лъимер кьун гьечIо бухизе, хвезабизе, кьун буго битIараб тарбия кьезе.
Эбел-инсуе рекъола лъималазе насихIат гьабизе, мекъи ккараб бакI берцинго бичIчIизабизе. Хасго балугълъиялде рахарал лъималазулгун накъит гIемер гьабизе ккола. Лъималазда хъачIлъи бихьизабиялъ мурадалде рачунаро. Хасго лъимер балугълъараб мехалда эбел-инсуе гьудулзаби гIадин рукIине. НасихIат гьабулев чи гьечIони лъимер кIудияб гIола щибго жо лъалареблъун. Гьединлъидал лъималазе кидаго хIажатаб жо буго насихIат. Нилъеда тIадаб жо гьабуни, лъимер лъикIабищ яги квешабищ лъугьунебали ТIадегIанав Аллагьасда гурони лъаларо. Амма гIемерисеб мехалда, Аллагьасул ﷻ хIукмуялда рекъон, лъикIаб тарбия щвараб лъимадул лъикIав инсан лъугьуна.
