Унтиги даруги
Дунял буго хIалбихьиялъул бакI. Гьелъул цояб ккола унтиги. Лъалеб жо буго инсанасул черх гьесул буголъи гуреб, Аллагьас ﷻ аманат гьабун гьесухъе, ай нилъехъе кьураб букIин. Щайин абуни, Гьев ﷻ вугелъул кинабго гIаламалъул БетIергьан.
БетIергьанас ﷻ нилъеда божилъи гьабун цIунизе кьураб жо буго черх. Гьединлъидал, гьелъие нилъеца зулму гьабуни, жаваб кьезе кьола Къиямасеб къоялъ БетIергьанасда ﷻ цебе.
Макъам-даража тIадегIанлъизе БетIергьанас ﷻ лъикIал чагIаздеги риччала унтаби. Гьединго, сабру гьабизе лъани, мунагьал чуризелъун гIаси-пасикъаздеги рачIуна гьел унтаби. Гьел тIаде рачIиндал щибха гьабизе рекъараб бугеб муъминзабазе?
Гьединаб хIалалда рекъараб буго, гьарурал мунагьаздаса тавбу гьабизе, хIарамаб тезе, ракIбухIун Аллагьасде ﷻ руссине, шукру гьабизе, сабруялда чIезе ва Аварагас ﷺ малъаралда нахърилълъине. Аварагас ﷺ щиб гьабизеха малъун бугеб унти бачIиндал?
Аварагас ﷺ абунин Абу-Дардаица бицун буго: «Аллагь ﷻ вуго унти бижаравги гьелъие дару кьолевги. Гьединлъидал нужеца гьеб сах гьабе, амма хIарамалдалъун гьабуге», - ан.
Аллагьасе ﷻ шукруги гьабун, сабруялда, дугIа-алхIамалда рукIине щивасе тавпикъ кьеги!
