РакIбацIалъиялъулъ буго хвасарлъи
Гьабулеб гIамал Аллагьасе ﷻ гIололъун гьечIого, гьелъулъ гIужбу-рияъ гIадаб напсалъул цониги бутIа жубараб мехалъ, щаклъи лъугьуна гьелъухъ киридай БетIергьанас ﷻ кьела, ялъуни гIакъубадай гьабилаян абураб. Гьединлъидал, гIамал букIине ккола ракI бацIцIадаб, ихласалда гьабураб.
Гурони, гьеб ахираталда гIададисеб, Аллагьасул ﷻ ццим бахъиналъегун гIакъуба гьабиялъе сабаблъун батизе рес буго.
Абу-Давудица бицараб хIадисалда буго: «БетIергьанас ﷻ кинаб бугониги гIамал къабул гьабуларо, Гьесие ﷻ гIололъун ракI бацIцIадго гьабураб гурони», - ян.
Анас асхIабас бицараб хIадисалда буго: «Къиямасеб къо чIедал малаикзаби рачIуна гIамалал хъварал тIанчалги росун. Цинги Аллагьас ﷻ гьезда абула гьаб къабул гьабе, гьаб цояб нахъе рехеян. ХIикмалъун малаикзабаз абула: “Я, нижер БетIергьан ﷻ, Дур тIадегIанлъиялхIаги, нижеца лагъас гьабураб гIамал гурони хъвачIо”, - ян. Гьеб мехалъ ТIадегIанас ﷻ абула: «Гьаб буго лагъас Дун гуресе гIоло гьабураб, жакъа Дицаги ﷻ гIицIго Дие гIололъун гьабураб гурони къабул гьабизе гьечIо», - ян.
ГIиса аварагасда гьесул къавмалъ ихлас щиб кколебин цIехедал, гьес абун буго: «Ихлас буго, инсанас лъикIаб гIамал гьабураб мехалъ, гьелъухъ цогияс рецц гьабизе бокьунгутIи», - ян.
Ихласалъул хиралъиялъул хIакъалъулъ МухIаммад аварагасги ﷺ абун буго: «КIудияб рохел буго жидеца гIамалалъулъ ихлас гьабулезе, гьел руго лъикIалде тIоритIиялъул чирахъал, жидедалъун квешал чагIазул питнаги сун кколел», - ан.
Гьеб гуребги, ихласалда гьабураб гIамал буго цоцазда гьоркьоб рокьи цIикIкIиналъе, вацлъи щулалъиялъе сабабги. Щайин абуни, аварагасдаса ﷺ бачIараб хIадисалда абулеб бугелъул, бусурманчиясул рекIелъ цоцаздехун тушманлъи-рокьукълъи бижизе гьукъулеб лъабго жоялъул цояб бугин Аллагьасе ﷻ гIоло ихласалда гьабулеб гIамалилан. Кин гьеб букIинареб, гьабулеб гIамал кьерилаздаса цеве ккезе яги цогиясулъ бугеб жиндилъги букIинчIого бегьиларин абурал гIадал пикрабигун гьабулеб мехалъ, гьеб кколелъул какарал пишабаздаса ва рихьдае гIоло гьаби.
Цо чияс ибну-МасгIудида цIехон буго, жиндаса лъугьараб мунагьалъе тавбу бугищин. Ибну-МасгIуд цин гьесдаса вуссун вуго ва кIиабизе гьесде валагьидал гьесда гьесул берал магIил цIун рихьана. Хадуб ибну-МасгIудица абуна: «ХIакълъунго, алжаналъе микьго баб (нуцIа) буго, тавбуялъул баб хутIизегIан, гьезул щибаб рагьула ва къала, тавбуялъул бабалда тIадин абуни вуго вакил гьавун тарав малаик гьеб къаларев, дуца (ракIбацIцIадго) гIамал гьабе ва Аллагьасдаса ﷻ хьулги къотIуге», - абун. Диналъулъ абиги буго ракI бацIцIалъиялъулъ гурони хвасарлъи гьечIин, гьединлъидал, Аллагьас ﷻ тавпикъ кьеги гIамал ихласалда гьабизе.
