ТалихIалъул кIул

Сон, жакъа ва метер

Къасимех щвезегIан чIаго хутIун ватани, ракIчIун вукIунге радаллъагIанги чIаго хутIизе ватиялда. Радалги чIаго ватани, божуге къасиялдехунги гьебго хIалалда вукIине бегьулеблъиялда. Мун гIумру гьабун вуго жакъа, ай гьабсагIат. Араб нахъбуссунаро, букIинесеб кинаб букIинебали лъаларо. Гьединлъидал къимат гьабе жакъасеб къоялъул. ГIумру гьабе жакъа дунялалде виччарав ва жакъаго ахираталдеги ине вугев чияс гIадин. Гьабулебщинабги гьабе ахирисеб нухалъ гьабулеб бугеб гIадин.

Как базе лъугьиндал гьеб ахирисеб букIин лъалеб бугони, киндай инсанас гьеб базе букIараб? Гьайгьай, тIокIаб гьечIебгIан цIакъ Аллагьасе мутIигIлъун, хIинкъун, чвахулаго магIугун. Щайха гьедин баларого бугеб щибаб как, хIакъикъаталдаги гьеб бан лъугIизегIанцин чIаго хутIизе ругищали нилъеда лъаларелъул.

ЛъикIаб хIалтIи-иш гьабулелъулги гьеб гьабизе ккола ахирисеб нухалъ гьабулеб бугебгIадин. Аралъул пикру гьабун ракI къварилъизе биччаге, кигIан къварилъахъданиги гьеб буго нахъбуссунареб гIумру. ХIинкъунги вукIунге бачIинеб бачIинареб лъалареб букIинеселдаса. Жакъаго гьабе гьабизе кIолебщинаб, рес бугебщинаб.

Метералде тIамун тезе ккани, мун метерлъагIан чIаго хутIиялда ракIчIунищ вугев? Щибаб лахIзат хIалтIизабе жакъасеб къо гIадада инчIого букIиналъе, гьабизе рес букIараб лъикIлъи метер гьабизе щвечIого хутIизеги бегьулин. Жакъа бугелдаса разиго вукIа, дуда лъаларелъулха дургоги духъ кодоб бугеб боцIулги метер щиб ккелебали.

Жакъа мун талихIавлъун ватани, мун хIакъикъаталдаги талихIав чи вуго. Сон яги церекъад дун талихIавлъун вукIанин дуда ракIалде кколеб батани ва кигIан кIудияб талихIалъ дуда къвал бан букIун батаниги, гьеб буго дудаса араб жо. Метерисеб талихI балагьулев ватани, гьебги буго гIададисеб хIалтIи. Метерисеб къо я бачIина я бачIинаро. Гьединлъидал, хIаркат бахъе жакъаго талихIавлъун вукIине. ХIалтIе ва диналдаго цадахъ магIишатги гьабе дунялалдаги ахираталдаги Аллагь разилъуледухъ

Дуца гIадамазе кьоге гIакъуба,
ГIакълу цебе гьабун хьваде ракьалда.
Мун гьоболлъухъ вукIин тоге кIочене,
КIалдиб мацI цIунизе бахъе хIаракат.

Чияе бухъараб гвандил тIиналде,
Мунго вортулеблъи хIакъаб букIин лъай.
Дуца дугIа гьабе дурго вацасе,
ГIумру-ризкъиялда лъолин баракат.

ГIакълу цебейилан ццим нахъейилан,
Умумузул аби бесса дур бидулъ.
Беццараб гьабизе, какараб тезе
Таманаб замана базе кколарин. 

Бокьараб босизе, рихараб тезе,
Кьун бугин Аллагьас щивасе гIумру.
Бокьаралда жаниб пайдаяб кквезе,
Кьун бугин Аллагьас щивасе гIакълу

ХIАБИБ МУХIАММАДОВ