Гъапуллъуге
Нилъеца гьаб дунялалда чан сон баниги, мурад буго гIумрудул ахиралда иманалда, исламалда, калиматул шагьадаталда рухIги иманалда бахъун дунял тей.
Хвезе рукIинги хIакъаб бугелъул, кинабниги жо Аллагьас сабабаздаги базабун бугелъул, иманалда хвезе ккани, гьелъиеги тIахьазда рихьизарурал сабабал хIалтIизаризе нилъедаги тIадаблъун бихьула. Рехсей гьабила рухI иманалда бахъиялъе ругел сабабал:
1) Аллагьасул, Аварагасул ﷺ нухда хьвади.
2) Зикруялда даимлъи. Аварагасул ﷺ хlадис буго: «Дуца дурго Бетlергьанасул цlар рехсей, мун тlубанго гьесдеги вусса».
3) Как ахlулеб мехалъ какие жаваб гьаби.
4) Аварагасда ﷺ василат гьари.
5) Как ахlун хадуб цlалулеб дугlа цlали. Аварагасул ﷺ хlадисалда буго: «Как ахlун хадуб Аварагасде салаватги битlани, василатги гьарани, дун гьев чиясе шафагlат гьабизе гъоркь чlарав вуго», - ян.
6) Рогьалил ва бакъанил какал жамагlатгун рай. Аварагасул ﷺ хlадис буго: «Жамагlатгун мажгиталда бараб как рокъоб баралдаса 27-ялъ цlикlкlуна», - ян.
7) Паризаял каказда хадур алхlам, къулгьу, къулагIузаби, аятул курси цIали. Гьединго рехсей гьабила рухI купруялда бахъизе бегьулел сабабал (Аллагьас цIунаги тIолабго МухIамадияб умматго гьелдаса):
1) Дунял ва дунялалъул лазатал гIемер цIикIкIун рокьи. Аварагас ﷺ абуна: Аллагьасда аскIоб гьаб дунял кIкIараялъул кваркьиялда бащалъулеб букIарабани, капурчиясе цо нухалъ къулчIизе лъим кьелароан. 2) ЧIухIи гьаби. Аварагас ﷺ абуна: «Мискъала заррагIанасеб чIухIи рекIелъ бугев чи алжаналде лъугьунаро», - ян. 3) Живго жиндаго лъикIав чилъун вихьи. Аллагьас Къуръаналда абун буго: «Нужеца нужго реццуге, Аллагьасда лъала Жиндаса унго-унгоги хIинкъулев чи», - ян. 4) Аллагь рехсеялдаса гъапуллъи. Аллагьас Къуръаналда абун буго: «Мун гъафулал чагIаздасан вукIунге». 6) Чияр руччабазухъ ралагьи. 7) ГIакъидаялъулъ мекъи ккей. ГIакъида мекъи ккараз гьабураб жо нилъеда бихьана, бачIинегIан течIого жидецаго тIаде бачана. ХIасил щиб ккарабали гIакълу бугезда бихьизеги бихьана. 8) ХIарамлъиялда даимлъи. 9) Аварагасул ﷺ нух ккунгутIи.
Аллагьас насиб гьабеги щивав бусурбанчиясе гьал сабабалги хIалтIизарун, иманалда дунял тезе.
