Бечелъизе бокьун бугищ?
Бечелъизе бокьуларев чи гьаб дунялалда цониги ватиларо. Бечелъи шаргIалъ гьукъараб жо гьечIо. Амма гьелъ гIемерисел гIадамал гуккулел рукIиналъ, чIухIи бачIинабулеб батиялъ, пахрулъи бижизабиялъ, ахираталдаса рикIкIалъизариялъ, закат-сахI бахъизе кIвахIаллъиялъ исламалъ гьеб какула.
Бичасул аварагас ﷺ асхIабзабазда малъана ризкъи бигьалъиялъе сабабал. Гьединаздаса цояблъун ккола Сагьлу бину СагIидиясдаса бицараб хIадис: «Бичасул аварагасде ﷺ цо чи зигардана жиндир пакъирлъиялдалъун ва магIишаталъулъ бугеб къварилъиялдалъун. Бичасул аварагас ﷺ гьесда абуна, рокъове лъугьунелъул гьенив ватарав чиясе салам кьеян. Гьенив щивго чи ватичIони жиндие салам кьеян. Цинги суратул «Ихлас», ай къулгьу цIалеян. Малъухъе гьабунила гьев чияс. Аллагьас гьесие боцIи-мал гьарза гьабунила, хIатта мадугьалзабазецин щолебгIан къадаралда», - ян.
Балагьеха, диналъул агьлу, захIматаб жо бугищ гьеб? Рокъове лъугьунелъул, саламги кьун, цо нухалда суратул «Ихлас» цIализе бугоха. ЦIакъго бигьаяб жо гьечIищ? Гьединлъидалин цIакъго кIвар гьабизе кколеб гьединал суннатазул. Аллагьас кумек гьабеги.
