Гъуниб

Гьал къоязда муфтияталъул районалда бугеб лъай кьеялъул отделалъул нухмалъулев ГIалиасхIаб Разакъов ва районалъул гIолилазул цевехъан Ибрагьимдибир Ибрагьимдибиров дандчIвана гIинда бакIазда гьоркьоб тIобитIараб эркенаб гугариялъул рахъалъ бергьарав СалтIа росулъа ГIабдурахIманов МухIаммадгун.

Гьединго дандчIваялда гIахьаллъи гьабуна ДРялъул спорталъул ва физическияб культураялъул министрасул заместитель ХIайдарбек ХIайдарбековас, спорталъул, культураялъул ва туризмалъул отделалъул начальник МухIаммад Сагитовас. «Нижеца гIолилал ахIула спорталде машгъуллъизе ва МухIаммадидаса мисал босизе», - ян бицана кIалъазе рахъараз.

УНСОКОЛО

ГIараб мацIалда хъвараб Дагъистаналъул муфти, шайих АхIмад афандил «Благонравие праведников» абураб тIехьалда тIасан конкурс тIобитIун букIана Унсоколо районалда. Дагьал церегIан къоязда гьелда бергьаралгун ва гIахьаллъаралгун дандчIвана ДРялъул муфти.

Муфтияс гьезда баркана бергьенлъи ва гьарана гьелдаса щвараб лъай гIумруялъулъ хIалтIизабизе тавпикъги къуватги. Къецалдайин абуни тIоцебесеб бакI ккуна Унсоколо районалдаса Фатима ХIасановалъ, кIиабилеб бакI щвана Гъизляр районалдаса АхIмад МухIаммадовасе ва лъабабилеб бакIалъе мустахIикълъана Шамил районалдаса Шамил Керимов.

ТIоцебесеб бакI ккуралъе кьуна гIумраялде ине сертификат, кIиабилеб бакIалъухъ – 30 000 гъурущ ва лъабабилеб бакIалъухъ – 20 000 гъурущ.

ХЬАРГАБИ

Районалъул имамзабазул советалъул председатель Тажудин ГIабдулаевасул нухмалъиялда гъоркь тIобитIана росабазул имамзабазул данделъи. Гьединго гьелда гIахьаллъи гьабуна «Инсан» фондалъул районалда бугеб филиалалъул вакил МухIаммадкамил Гъазиевас ва муфтияталъул вакил Ислам МухIаммадовас.

«Инсан» фондалъул вакил МухIаммадкамил Гъазиевас бицана Къурбанкъоялде гьабун бугеб хIадурлъиялъул хIакъалъулъ. Гьединго гьес абуна рокъоса къватIивеги вахъинчIого, фондалъул кумекалалъун, бокьарав чиясулги рес бугин къурбан хъвезе.

ГIАХЬВАХЪ

«Они защитили честь Дагестана» абураб ахIиялда гъоркь, районалъул библиотекаялда тIобитIана 1999 соналда Болъихъ районалда ккарал лъугьа-бахъиназе сайгъат гьабураб тадбир. Гьелда гIахьаллъи гьабурав районалъул имамзабазул советалъул председателасул кумекчи Шамсудин Шамсудиновас бицана нилъер щивас хIалтIи гIуцIизе кколеб куцалъул ва терроризмалдегун экстремизмалде данде къеркьезе тIадаб букIиналъул хIакъалъулъ.

Тадбиралъул ахиралда районалъул бетIер МуртазагIалиев МухIаммадица шапакъатал кьуна рагъулал ишазулъ гIахьаллъаразе.

БОЛЪИХЪ

Районалъул имамзабазул советалъул председатель ГIабдула Герейхановасул нухмалъиялда гъоркь, микрорайоналда бугеб мадрасалда, тIобитIана имамзабазе дарс. Гьелдаса хадуб имамзабаз бицана жиде-жидер росулъ Къурбан къоялде гьабулеб бугеб хIадурлъиялъул хIакъалъулъги дандрана батIи-батIиял суалалги.

ШАМИЛ

Районалъул Могьохъ росулъ тIобитIана Могьохъ ва Гъоркьа Бакълъухъ росдал гIолилазда гьоркьоб футбол хIаялъул рахъалъ къец. Гьеб тадбиралда гIахьаллъи гьабуна районалъул имамзабазул советалъул председатель Юсуф ТIалхIатовас, муфтияталъул районалда бугеб лъай кьеялъул отделалъул нухмалъулев АхIмад Дибировас, кIиябго росдал имамзаби МухIаммад МухIаммадовас ва МухIаммад ГIумаровас. Гьайгьай гьединал тадбираз цолъизарула гIолилал ва цIикIкIинабула цоцазда гьоркьоб вацлъи.

ГУМБЕТ

Гьал къоязда районалъул гIолилазда гьоркьоб тIобитIана пляжалъулаб футболалъул турнир. Тадбиралда гIахьаллъи гьабуна ва гIолилазда цеве вахъун кIалъана Гумбет районалъул бетIер ХIажимурад МухIамадов, районалъул имамзабазул советалъул председатель Шамил ХIажиев, ГТОялъул вакил Юнус НурмухIамадов, ДРялъул бетIерасул кумекчи Сайпудин Саипов ва «Патриоты» ассоциациялъул председатель Шамил ГIабдулахIажиев.

ЧIАРАДА

Гьал къоязда районалъул имамзабазул советалъул председатель ГIузайр Давудовас ва лъай кьеялъул отделалъул нухмалъулев ШагIбан ХIапизовас тIобитIана АТКялъул отделалъул начальник Асад МухIамадовасулгун ва гьебго отделалъул бетIерав махщелчи Рустам Мусаевасулгун дандчIвай.

Гьез гьоркьоб лъун букIана пандемиялъул заманалда дандчIвалел захIмалъабазул суалал. Гьелда бан хIукму ккана, тIоритIизе рукIарал рухIаниял, администрациялъулал, районалъул спорталъул отделалъулал ва «ЧIарада районалъул гIолилал» гIуцIиялъул киналниги данделъаби нахърахъизе.